ព្រឹត្តិការណ៍បាល់ទាត់ក្របខណ្ឌក្លិបអាជីពអឺរ៉ុប UEFA Champions League នឹងរកឃើញជើងឯករដូវកាលនេះនៅថ្ងៃទី១ ខែមិថុនាខាងមុខ ដែលនឹងធ្វើនៅកីឡដ្ឋាន Wanda Metropolitano របស់ក្លិប Atletico Madrid ទីក្រុង Madrid ប្រទេសអេស្ប៉ាញ។
កីឡដ្ឋានដែលជាទឹកដីរបស់ Atletico Madrid មួយនេះអាចផ្ទុកទស្សនិកជនបាន 68000នាក់ ទើបបើកសម្ពោធកាលពីរដូវកាល ២០១៧-១៨ ក្រោមការវិនិយោគសាងសង់កែច្នៃឡើងវិញ ដោយក្រុមហ៊ុនចិន Wanda Group ចំណាយអស់ថវិកាប្រមាណ ២៤០លានអឺរ៉ូ។ ប្រព័ន្ធសុវត្ថិភាពត្រូវបានរឹតបន្តិចទ្វេរដង សំរាប់វគ្គផ្ដាច់ព្រ័ត្រនៅថ្ងៃទី១ ដើមខែក្រោយនេះ ធានាឲ្យបានសុខសុវត្ថិភាពភ្ញៀវទេសចរ និងអ្នកគាំទ្រមកពីជុំវិញពិភពលោក ជាពិសេសអ្នកគាំទ្រមកពីប្រទេសអង់គ្លេស។
Liverpool និង Spurs ត្រូវបានផ្ដល់សិទ្ធិលក់សំបុត្រឲ្យអ្នកគាំទ្ររបស់ខ្លួនម្ខាង 16613សន្លឹកសំរាប់ការប្រកួតវគ្គផ្ដាច់ព្រ័ត្រ UEFA Champions League នៅទីក្រុង Madrid។ ហង្សក្រហម ទើបតែបានបង្ហាញតំលៃសំបុត្រ សំរាប់លក់ដល់អ្នកគាំទ្ររបស់ខ្លួន ខណៈដែលតំលៃថោកបំផុតគឺ 60ផោនមាន ២០% ខណៈតំលៃសំបុត្រផ្សេងទៀតមាន 154ផោន ៥៤% តំលៃ ៣៨៥ផោនមាន ២១% និង ៥១៣ផោនមាន ៥%។
UEFA បានលក់ចេញហើយសំបុត្រចំនួន ៤០០០សន្លឹកទៅអ្នកគាំទ្រជុំវិញពិភពលោក សំរាប់ការប្រកួតដែលនៅកីឡដ្ឋាន Wanda Metropolitano របស់ Atletico Madrid ដែលផ្ទុកទស្សនិកជនបាន ៦៨០០០នាក់។ សំបុត្រនៅសល់ពីការបែងចែកខាងលើ រួមមានគណៈកម្មការរៀបចំសំរាប់ UEFA, សមាគមបាល់ទាត់ប្រទេសផ្សេងៗ ដៃគូពាណិជ្ជកម្ម និងក្រុមហ៊ុនផ្សាយផ្ទាល់ជាដើម។ រំលឹកថា នេះជារដូវកាលទី២ ហើយដែល Liverpool ឡើងវគ្គផ្ដាច់ព្រ័ត្រ បន្ទាប់ពីឆ្នាំមុននៅទីក្រុង Kiev ប្រទេសអ៊ុយក្រែនដែលចាញ់ Real Madrid ៣-១ នោះ Liverpool លក់សំបុត្រមានតំលៃពី ៦១ផោនដល់ ៣៩៤ផោន៕