ខ្សែ​បម្រើ​ក្លឹប Manchester United កីឡាករ​ Paul Pogba បាន​ប្រាប់​សារព័ត៌មាន RMC Sports ថា អនាគត​របស់​ខ្លួន​នៅ​ក្លឹប​បិសាច​ក្រហម​ នៅ​តែ​មិន​ទាន់​ច្បាស់​នៅ​ឡើយ ប៉ុន្តែ​ប្ដេជ្ញា​លះបង់​អ្វី​គ្រប់​យ៉ាង​ពេល​នៅ​លេង​នៅ​ក្លឹប​ដែល​មាន​មូលដ្ឋាន​នៅ Old Trafford។

កីឡាករ​ដែលមានតំលៃខ្លួនខ្ពស់ Pogba ក៏​ដូច​ជា ភ្នាក់ងារ​របស់​ខ្លួន​បាន​បង្ហើប​ជា​ច្រើន​ដង​ហើយ​ថា ខ្លួន​មាន​បំណង​ចង់ចាកចេញ​ពីក្លឹប Manchester United នេះ​បើ​តាម​សារព័ត៌មាន Sky Sports​ បានចុះផ្សាយ ។

Paul Pogba បាន​និយាយ​ថា៖ ” ខ្ញុំ​តែងតែ​មាន​អារម្មណ៍​ល្អ​ពេល​លេង​បាល់។ ខ្ញុំ​ធ្វើ​អ្វី​ដែល​ខ្ញុំ​ស្រលាញ់។ ប៉ុន្តែ​យើង​បាន​ឮ​ពាក្យ​ចចាមអារ៉ាម​ជា​ច្រើន​ហើយ។ មាន​តែ​ពេល​វេលា​ទេ អាច​ប្រាប់​បាន។ អនាគត​របស់​របស់​ខ្ញុំ​នៅ​តែ​មាន​សញ្ញា​សួរ​នៅ​ឡើយ ” ។

Pogba ក៏បានបញ្ជាក់​បន្តទៀត​ថា៖ ” ខ្ញុំ​នៅរស់នៅជាមួយក្លឹប Manchester ហើយ​ខ្ញុំ​កំពុង​តែ​សប្បាយ​ជាមួយ​មិត្តរួមក្រុម​របស់​ខ្ញុំ។ ខ្ញុំ​តែង​តែ​ចង់​ឈ្នះ​ប្រកួត ហើយ​ខ្ញុំ​នឹង​លះបង់​អ្វី​គ្រប់យ៉ាង នៅ​ពេល​ខ្ញុំ​លេង​លើ​ទីលាន ” ៕