Virgil Van Dijk យកឈ្នះ Messi និង Ronaldo គ្រងពានកីឡាករល្អបំផុតប្រចាំឆ្នាំរបស់ UEFA

ការចាប់ឆ្នោតបែងចែកពូលសម្រាប់ព្រឹត្តិការណ៍ UEFA Champions League ត្រូវបានបញ្ចប់កាលពីយប់មិញនេះ ស្របពេលការប្រគល់ពានរង្វាន់ឯកជននានា ក៏ត្រូវបានបញ្ចប់ផងដែរ។ ក្នុងនោះទៀតសោត កីឡាករល្អៗជាច្រើនបានទទួលនូវពានរង្វាន់ប្រចាំឆ្នាំរបស់ខ្លួន ក្រោមក្រសែភ្នែកថ្នាក់ដឹកនាំ UEFA ក៏ដូចជាភ្ញៀវកិត្តិយសល្បីៗជាច្រើនក្នុងវិស័យបាល់ទាត់ផងដែរ។

ក្នុងនោះពានរង្វាន់អ្នកចាំទីល្អបំផុតប្រចាំឆ្នាំរបស់ UEFA ត្រូវបានប្រគល់ជូនទៅកីឡាករ Allison Becker ខណៈដែលពានរង្វាន់ខ្សែការពារល្អបំផុតប្រចាំឆ្នាំ គ្មានអ្នកណាផ្សេងឡើយក្រៅតែពី Virgil Van Dijk។

ដោយឡែកសម្រាប់ពានរង្វាន់ខ្សែបម្រើល្អបំផុតប្រចាំឆ្នាំ ត្រូវធ្លាក់ទៅលើកីឡាករឆ្នើមវ័យក្មេងរបស់ក្លិប Barcelona, Frankie De Jong បន្ទាប់ពីរូបគេបានបង្ហាញខ្លួនយ៉ាងល្អជាមួយអតីតក្លិបចាស់ Ajax។ ចំពោះពានរង្វាន់ខ្សែប្រយុទ្ធល្អបំផុតប្រចាំឆ្នាំ ត្រូវធ្លាក់ទៅលើកីឡាករ Lionel Messi របស់ក្លិប Barcelona បន្ទាប់ពីរដូវកាលមុនរូបគេរកបានរហូតដល់ ១២គ្រាប់ និង Assist បាន ៣លើកនៅ UEFA Champions League ព្រមទាំងជួយឱ្យក្លិបឈ្នះពាន La Liga និងឈានដល់វគ្គពាក់កណ្ដាលផ្ដាច់ព្រ័ត្រ UCL ទៀតផង។

ចុងក្រោយគេបំផុត សម្រាប់ពានរង្វាន់កីឡាករល្អបំផុតប្រចាំឆ្នាំរបស់ UEFA ត្រូវធ្លាក់ទៅលើកីឡាករ Virgil Van Dijk របស់ក្លិប Liverpool ដោយបានយកឈ្នះកីឡាករ Lionel Mesi និង Cristiano Ronaldo គ្រងពាន UEFA Best Men’s POTY រដូវកាលនេះតែម្តង៕