នៅទីបំផុត អ្នកប្រដាល់មកពីជាយដែនខេត្តបន្ទាយមានជ័យ ឃីម បូរ៉ា បានស្វែងរកឃើញជ័យជម្នះដ៏ធំ នៅក្នុងអាជីពរបស់ខ្លួនហើយ គឺការទទួលបានខ្សែក្រវាត់ ជាលើកដំបូង បន្ទាប់ពីរូបគេ បានយកឈ្នះ តាញ់ មករា ក្នុងការប្រកួតផ្តាច់ព្រ័ត្រដណ្តើម ក្នុងព្រឹត្តិការណ៍ «កម្ពុជាសង្វៀនគុនខ្មែរ» នៅលើសង្វៀន CNC កាលពីថ្ងៃសៅរ៍។

ឃីម បូរ៉ា ដែលធ្លាប់ចាញ់នៅក្នុងការប្រកួតផ្តាច់ព្រ័ត្រ ចំនួន៥លើកនោះ បានបង្ហាញការសប្បាយរីករាយខ្លាំង ចំពោះការឈ្នះបានខ្សែក្រវាត់ជាលើកដំបូង សម្រាប់ការប្រឡូកក្នុងអាជីពប្រដាល់ចូល១៤ឆ្នាំមកនេះ ប៉ុន្តែការឈ្នះបានខ្សែក្រវាត់ អមជាមួយប្រាក់រង្វាន់២៤លានរៀលនេះ ពិតជាមានការពិបាកខ្លាំង ព្រោះអ្នកទាំង២នេះ បានវាយប្តូរគ្នាទៅវិញទៅមកចំនួន៥ទឹកពេញតែម្តង។
យ៉ាងណាក៏ដោយ «ការព្យាយាមប្រាប់ខ្លួនឯងកំឲ្យភ័យ» វាបានក្លាយជាមូលហេតុដ៏ចម្បង ដែលបានជួយឲ្យ ឃីម បូរ៉ា អាចសម្រួលអារម្មណ៍ខ្លួនឯង ហើយអាចប្រកួតបានយ៉ាងស្វិតស្វាញ ដើម្បីយកឈ្នះលើ តាញ់ មករា ព្រោះផ្លែកែង និងកណ្តាប់ដៃរបស់គេ វាយចំគោលដៅបានល្អជាងការទាត់ និងបុកជង្គង់របស់ មករា។

កីឡាករ ឃីម បូរ៉ា បាននិយាយថា៖ «នៅមុនការប្រកួត ខ្ញុំពិតជាមានអារម្មណ៍ភ័យ ប៉ុន្តែខ្ញុំបានព្យាយាមប្រាប់ខ្លួនឯងថា នេះគ្រាន់តែជាការប្រកួតមិត្តភាពធម្មតា សូមកុំភ័យអី ហើយខ្ញុំពិតជាសប្បាយចិត្តខ្លាំងណាស់ ព្រោះនេះជាខ្សែក្រវាត់ដំបូង ដែលខ្ញុំដណ្តើមបាន នៅក្នុងអាជីពជាអ្នកប្រដាល់របស់ខ្ញុំ»។

ទោះបីជាយ៉ាងណា ឃីម បូរ៉ា បានសរសើរទៅលើទម្ងន់វាយចេញរបស់ តាញ់ មករា ដែលពេលខ្លះ ស្ទើតែធ្វើឲ្យរូបគេដើរមិនរួច។ ប្អូនប្រុសរបស់ម្ចាស់មេដាយមាសស៊ីហ្គេម ឃីម ឌីម៉ា និងកូនរបស់លោកគ្រូ ហេង ប៊ុនឃីម រូបនេះ បាននិយាយថា៖ «តាញ់ មករា ជាកីឡាករល្អម្នាក់ ព្រោះគាត់វាយចេញមកធ្ងន់ៗមែនទែន! ជួនកាលពេលត្រូវ១ជើងៗរបស់គាត់ សឹងតែធ្វើឲ្យខ្ញុំដើរលែងចង់រួច»។

ជាមួយគ្នានេះ តាញ់ មករា ដែលទទួលបានប្រាក់រង្វាន់ចំនួន១២លានរៀល ក្នុងនាមជាជើងឯករងនោះ ហាក់មិនសូវសប្បាយចិត្ត ទទួលយកការសម្រេចឲ្យចាញ់នេះទេ បើទោះបីជា ចៅក្រមទាំង៥នាក់ បានសម្រេចឲ្យរូបគេ ចាញ់ពិន្ទុ ឃីម បូរ៉ា ជាឯច្ឆន្ទ ៥-០ ក៏ដោយ។

នៅពេលពិធីករសួរនាំពីការសម្រេចឲ្យចាញ់នេះ តាញ់ មករា បានឆ្លើយតបទាំងបង្ខំចិត្តថា៖ «ខ្ញុំខំប្រឹងវាយ៥ទឹកអស់ហើយ អ៊ីចឹងការចាញ់ វាអាស្រ័យទៅលើចៅក្រមដាក់ពិន្ទុ។ ទោះជាយ៉ាងណា នេះជាការសម្រេចឲ្យចាញ់…អ៊ីចឹងខ្ញុំទទួលថា ចាញ់ដោយឯកច្ឆន្ទ»៕