នៅទីបំផុត សហព័ន្ធកីឡាប្រដាល់កម្ពុជា និងអ្នកគ្រប់គ្រងសង្វៀនប្រដាល់ CNC បានសម្រេចលុបចោលការលើកពេលការប្រកួតផ្តាច់ព្រ័ត្ររវាងកីឡាករ ម៉ឺន មេឃា និង ឃីម បូរ៉ា ដោយប្រគល់ជ័យជម្នះទៅឱ្យកីឡាកររងគ្រោះ ឃីម បូរ៉ា តែម្តង ដើម្បីបញ្ចប់ភាពចម្រូងចម្រាស និងការរិះគន់ពីមហាជន។
ការសម្រេចផ្តល់ខ្សែក្រវាត់ និងពានលេខ១ ទៅលើកីឡាករ ឃីម បូរ៉ា នេះ ត្រូវបានលោក ម៉ា ស៊ីថេត អ្នកគ្រប់គ្រងឱ្យបានដឹង នៅលើផេចហ្វេសប៊ុករបស់ខ្លួន កាលពីយប់ថ្ងៃអាទិត្យ គឺបន្ទាប់ពីលោកនាយករដ្ឋមន្រ្តី ហ៊ុន សែន បានប្រតិកម្ម និងចាត់ទុកការសម្រេចលើកពេលការប្រកួតដ៏ចម្រូងចម្រាស រវាង ម៉ឺន មេឃា និង ឃីម បូរ៉ា នៅលើសង្វៀន CNC នេះ ថា ជារឿងខុស ចំណែកការប្រគល់ខ្សែក្រវាត់ និងពានលេខ១នេះ ត្រូវបានធ្វើឡើង នៅ CNC ផ្ទាល់ កាលពីព្រឹកថ្ងៃចន្ទនេះ។
ការចូលរួមផ្តល់ជាមតិយោបល់ និងរិះគន់របស់លោកនាយករដ្ឋមន្រ្តី ទៅលើកំហុសឆ្គងនៃការកាត់សេចក្តីនេះ វាប្រៀបដូចជាការវាយមួយព្រនង់ ទៅលើមន្រ្តីបច្ចេកទេសរបស់សហព័ន្ធកីឡាប្រដាល់គុនខ្មែរ ដែលបានបង្កើតកំហុសយ៉ាងធំ ព្រោះការចាប់ ឃីម បូរ៉ា បោកដូចកីឡាកាសបណ្តាលឱ្យសន្លប់ធំ ពីសំណាក់កីឡាករ ម៉ឺន មេឃា វាស្តែងឱ្យឃើញច្បាស់រួចទៅហើយថា ជាការប្រព្រឹត្តខុសពីបទបញ្ជានៃការប្រកួត ដែលត្រូវប្រគល់ជ័យជម្នះទៅឱ្យកីឡាកររងគ្រោះ ឃីម បូរ៉ា ចុះហេតុអ្វីចាំបាច់ត្រូវលើកពេលនៃការប្រកួតនេះ ទៅ២សប្តាហ៍ខាងមុខ។
ជុំវិញនឹងភាពចម្រូងចម្រាសនៃការលើកពេលប្រកួតរវាង ម៉ឺន មេឃា និង ឃីម បូរ៉ា កាលពីថ្ងៃសៅរ៍កន្លងមកនេះ លោកនាយករដ្ឋមន្រ្តី ហ៊ុន សែន បានសរសេរបង្ហោះនៅលើផេចហ្វេសប៊ុករបស់លោក កាលពីយប់ថ្ងៃអាទិត្យថា៖ «ដោយអត់ទ្រាំមិនបាន ខ្ញុំសូមចេញមកនិយាយក្នុងនាមជាពលរដ្ឋខ្មែរម្នាក់ ដែលស្រឡាញ់វិស័យកីឡា។ តើយើងត្រូវពង្រឹងអាជ្ញាកណ្តាលកីឡាប្រដាល់ ឬត្រូវបង្កើតក្បាច់គុនថ្មី ដោយកំណត់លក្ខខណ្ឌប្រកួតថ្មី? វាយខុសក្បួនហើយ មិនព្រមប្រកាសលទ្ធផល និងលើកពេល ទៅប្រកួតនៅពេលក្រោយ»។
ប្រមុខដឹកនាំប្រទេសកម្ពុជា រូបនេះ បានបន្ថែមថា៖ «តើឱ្យកីឡាប្រដាល់យើងឈានទៅមុខម្តេចបាន បើសហព័ន្ធកីឡាប្រដាល់យើង ទុកឱកាសឱ្យអាជ្ញាកណ្តាលធ្វើបែបនេះ? តើមានក្បួនមកពីណា វាយខុសក្បួនខ្នាតហើយ សម្រេចលើកពេលទៅប្រកួតពេលក្រោយ សូម្បីតែបាល់ទាត់ បើទាត់ខុស ត្រូវពិន័យកាតលឿង ឬកាតក្រហម ដោយដេញចេញ ឬពិន័យបាល់ ១១ ម៉ែត្រភ្លាមៗ ដោយមិនទុកពេលឱ្យតវ៉ានោះទេ»។
លោកនាយករដ្ឋមន្រ្តី ហ៊ុន សែន ដែលបានទស្សនាការប្រកួតរវាង ឃីម បូរ៉ា និង ម៉ឺន មេឃា តាមរយៈការផ្សាយផ្ទាល់នោះ បានបញ្ជាក់ថា៖ «ខ្ញុំមិនបន្ទោសកីឡាករទេ ព្រោះពួកគាត់ស្តាប់តាមការកាត់ក្តីរបស់អាជ្ញាកណ្តាល។ អ្វីដែលខ្ញុំសុំ គឺអាជ្ញាកណ្តាល ត្រូវតែមានយុត្តិធម៌ក្នុងខ្លួន»។
គួររំឭកថា សម្រាប់ការប្រកួត នៅវគ្គផ្តាច់ព្រ័ត្រ ដណ្តើមខ្សែក្រវាត់គោលជល់ អមដោយទឹកប្រាក់ចំនួន ៥ ០០០ ដុល្លារ នៅលើសង្វៀន CNC កាលពីថ្ងៃសៅរ៍ កន្លងមកនេះ កីឡាករម៉ឺន មេឃា ដែលទំនងចាញ់ប្រៀបពិន្ទុ ឃីម បូរ៉ា ទៅហើយនោះ ចាប់បោក ឃីម បូរ៉ា ដូចការប្រកួតកីឡាកាស បណ្តាលឱ្យ ឃីម បូរ៉ា សន្លប់ធំ នៅក្នុងទឹកទី ៣។
ការប្រព្រឹត្តខុសពីបទបញ្ជា និងច្បាប់នៃការប្រកួតរបស់សហព័ន្ធកីឡាប្រដាល់គុនខ្មែរ ត្រូវបានគេគិតថា គណៈកម្មការ នឹងផ្តល់ជ័យជម្នះទៅឱ្យកីឡាកររងគ្រោះ ឃីម បូរ៉ា ប៉ុន្តែផ្ទុយទៅវិញ ក្រុមមន្រ្តីបច្ចេកទេសរបស់សហព័ន្ធ ទាំងនេះ បែរជាសម្រេចមិនប្រកាសលទ្ធផល ហើយលើកពេលការប្រកួតនេះ ទៅធ្វើឡើងវិញ នៅ ២ សប្តាហ៍ក្រោយទៀត ទៅវិញ។ តែទោះបីជាយ៉ាងណា ដោយមានការរិះគន់ខ្លាំង ពិសេសការរិះគន់ ក្នុងន័យស្ថាបនារបស់លោកនាយករដ្ឋមន្រ្តី បានធ្វើឱ្យសហព័ន្ធ និងអ្នកគ្រប់គ្រងសង្វៀន CNC សម្រេចលុបចោលការសម្រេចមុន និងបានឯកភាពប្រគប់ខ្សែក្រវាត់ ពានលេខ១ និងប្រាក់រង្វាន់ ៥០០០ ដុល្លារទៅឱ្យ ឃីម បូរ៉ា តែម្តង ហើយ ម៉ឺន មេឃា បានចំណាត់ថ្នាក់លេខ២៕