ប្អូនប្រុសបង្កើតរបស់ម្ចាស់មេដាយមាសស៊ីហ្គេម ឃីម ឌីម៉ា គឺ ឃីម បូរ៉ា ត្រូវបានគេមើលឃើញថា មានភាគរយខ្ពស់ជាងគេ ដែលអាចនឹងក្លាយជាម្ចាស់ជើងឯក ក្នុងការប្រកួតម៉ារ៉ាតុងដណ្តើមប្រាក់លាន ទម្ងន់៦០គីឡូក្រាម នៃកម្មវិធី Mas Fight Cambodia នៅលើសង្វៀនថោន នាថ្ងៃអាទិត្យនេះ។
ការវាយតម្លៃមុនការប្រកួតឈានចូលមកដល់នេះ បេក្ខភាព៣នាក់ទៀតរួមមាន តាញ់ មករា, សោម វិឆ័យ និង គង់ ហូវ សុទ្ធតែធ្លាប់ចាញ់ ឃីម បូរ៉ា កន្លងមក ប៉ុន្តែគេនៅមិនទាន់ដឹងថា ឃីម បូរ៉ា នឹងចាប់ឆ្នោតប៉ះកីឡាកររូបណា នៅក្នុងការប្រកួតវគ្គជម្រុះ៣ទឹកនោះទេ ហើយអ្នកឈ្នះ នឹងឡើងប្រកួតផ្តាច់ព្រ័ត្រ ដោយវ៉ៃគ្នា៩នាទីគ្មានឈប់ ហើយអ្នកផ្តួលគូប្រកួតឲ្យសន្លប់ ទើបអាចក្លាយជាម្ចាស់ទឹកប្រាក់ ៣,៤លានរៀល។
យ៉ាងណាក៏ដោយ នៅក្នុងចំណោមបេក្ខភាពទាំង៣នេះ តាញ់ មករា មានសមត្ថភាពអាចប្រកួតប្រជែងជាមួយ ឃីម បូរ៉ា បាន។ បើទោះបីជា មករា ទើបចាញ់ បូរ៉ា ក្នុងការប្រកួតផ្តាច់ព្រ័ត្រ នៅសង្វៀន CNC កាលពីថ្ងៃទី១៣ ខែមិថុនា ឆ្នាំ២០២០ ប៉ុន្តែការប្រកួត ដែលមានភាពស្វិតស្វាញបំផុត ហើយ តាញ់ មករា ក៏មិនអស់ចិត្តចំពោះការចាញ់នោះទេ។
ប៉ុន្តែលោក ធន់ សុភា គ្រូបង្វឹក តាញ់ មករា បានប្រាប់ប្រព័ន្ធផ្សព្វផ្សាយថា៖«ការប្រកួតដែលលំបាក និងជាឧបសគ្គធំជាងគេចំពោះ តាញ់ មករា ក្នុងការប្រកួតដណ្តើមប្រាក់លាននេះ គឺ ឃីម បូរ៉ា នេះឯង ប៉ុន្តែបើជួប គង់ ហូវ ឬ សោម វិឆ័យ នៅវគ្គជម្រុះនោះ តាញ់ មករា មានសង្ឃឹមបានឡើងទៅវគ្គផ្តាច់ព្រ័ត្រ ដោយមិនព្រួយឡើយ»។
ដោយឡែក គង់ ហូវ ទើបតែចាញ់ ឃីម បូរ៉ា ក្នុងការប្រកួត៣ទឹក នៅសង្វៀន PNN កាលពីថ្ងៃអាទិត្យ សប្តាហ៍មុន ហើយយោងតាមការប្រកួតនោះ គឺសមត្ថភាពប្រកួតរបស់ គង់ ហូវ មិនអាចយកឈ្នះលើ ឃីម បូរ៉ា បាននោះទេ ហើយគ្រូបង្វឹករបស់គេ ក៏យល់ឃើញបែបនេះដែរ។