កីឡាករជើងខ្លាំងគ្មានគូប្រៀបក្នុងប្រភេទទម្ងន់៦០គីឡូក្រាម ឃីម បូរ៉ា បាននឹងកំពុងបន្សាំខ្លួន ទៅនឹងស្ថានភាពនៃការតម្លើងទម្ងន់មក ៦៣,៥គីឡូក្រាម ដើម្បីមានទីផ្សារប្រកួតឡើងវិញ ប៉ុន្តែ បូរ៉ា បានអះអាងថា ការតម្លើងទម្ងន់នេះ មានការលំបាក និងចាញ់ប្រៀបគេផ្នែកកម្លាំង។
«សម្រាប់ការឡើងប្រកួតក្នុងទម្ងន់៦៣,៥គីឡូក្រាម ចំនួន២ទៅ៣ដង កន្លងមកនេះ យើងនៅតែមានបញ្ហាលើផ្នែកកម្លាំង គឺយើងនៅតែចាញ់កម្លាំងគេ។ យើងអាចទប់ទល់ និងវាយសងទៅវិញទៅមកជាមួយគេបាន ប៉ុន្តែវាពិបាកត្រង់ថា ពេលយើងវ៉ៃត្រូវគេ មិនសូវមានទម្ងន់ដូចគេមកយើង»។
នេះជាការបង្ហាញពីការយល់ឃើញរបស់ ឃីម បូរ៉ា សម្រាប់ការឡើងទៅប្រកួតទម្ងន់៦៣,៥គីឡូក្រាម កន្លងមក ហើយការឡើងប្រកួតទម្ងន់នេះ នៅសង្វៀន CNC ឃីម បូរ៉ា បានចាញ់ពិន្ទុ ឡុង សំណាង និងចាញ់ ពិន្ទុ ឡុង បេនលឿន ចំណែកនៅថ្ងៃអាទិត្យនេះ ឃីម បូរ៉ា នឹងត្រូវដាក់ឱ្យប្រកួតក្នុងកម្មវិធី ONEStrike ជាមួយជើងថ្មី នៅ ដារ៉ូ នៅលើសង្វៀន PNN។
បើទោះបីជាកម្មវិធីនេះ តម្រូវឱ្យធ្វើការប្រកួត២ទឹក ហើយ១ទឹកមានដល់៧នាទី ប៉ុន្តែសម្រាប់ ឃីម បូរ៉ា មិនបានបង្ហាញការខ្វល់ទៅលើបញ្ហានេះនោះទេ ប៉ុន្តែអ្វីដែលគេនៅតែចាប់អារម្មណ៍ចំពោះខ្លួនឯងនោះ គឺការតម្លើងទម្ងន់មកប្រកួត ៦៣,៥គីឡូក្រាមនេះ វាហាក់នៅមិនទាន់សមចំពោះរូបគេ ហើយកម្លាំងនៃ ការវាយចេញ ក៏មិនសូវជាមានទម្ងន់។
កីឡាករជម្រើសជាតិគុនខ្មែរ ឃីម បូរ៉ា បានបន្ថែមថា៖ «ខ្ញុំអត់សូវស្គាល់គាត់ដែរ តែខ្ញុំនឹងមើលវីដេអូនៃការប្រកួតរបស់គាត់ ដើម្បីសិក្សាទៅលើរបៀបប្រកួតរបស់គាត់ ខណៈពេលនេះ ទម្ងន់ពិតរបស់ខ្ញុំ បានឡើងដល់៦៣គីឡូក្រាមហើយ។ តែទោះបីជាយ៉ាង កាលប្រកួតក្នុងទម្ងន់៦០គីឡូក្រាម គឺពេលវ៉ៃចំដៃគូ រាងធ្ងន់ តែប្រកួតទម្ងន់៦៣,៥គីឡូក្រាម ពេលវ៉ៃត្រូវគេ ហាក់ដូចជាគេអត់សូវឈឺ»។
ចំពោះការប្រកួត២ទឹក ក្នុង១ទឹកមាន៧នាទីនេះ ជើងខ្លាំងមកពីខេត្តបន្ទាយមានជ័យ ឃីម បូរ៉ា បានបញ្ជាក់ថា៖ «ការប្រកួត៧នាទី ក្នុង១ទឹក ក្នុងទម្ថន់៦៣,៥គីឡូក្រាម លើកនេះ ខ្ញុំគិតថា អត់អីទេ ព្រោះខ្ញុំហាត់នៅទីនេះ (ស្តាតចាស់) គឺ១ទឹក ខ្ញុំហាត់ដល់១០នាទីឯណោះ អ៊ីចឹងកម្លាំងស៊ុហ្វពេញ។ ចំណែកឱកាសផ្តួលគូប្រកួតបានឬយ៉ាងណានោះ គឺចាំមើលជាក់ស្តែងទៅ ព្រោះកីឡា ពេលមានឱកាស ដឹងតែផ្តាច់ហើយ»៕