ក្រុម Bayern Munich បានក្លាយជាម្ចាស់ជើងឯកក្របខ័ណ្ឌ Bundesliga កាលពីថ្ងៃអង្គារ ក្រោយពីបានលើកពានលីកនេះជាលើកទី៨ជាប់ៗគ្នា ខណៈដែលគ្រាប់បាល់ស៊ុតបញ្ចូលទីយ៉ាងល្អរបស់ខ្សែប្រយុទ្ធ Robert Lewandowski បានជួយឲ្យក្រុមខ្លួនទទួលជ័យជម្នះ ១-០ ស្របពេលក្រុម Paderborn ត្រូវបានកាត់ចេញពីក្របខ័ណ្ឌកំពូលរបស់អាល្លឺម៉ង់ នៅទីក្រុងបែរឡាំង។
Bayern បានកត់ត្រាជ័យជម្នះជាលើកទី៨ជាប់ៗគ្នារបស់ខ្លួន បើគិតចាប់តាំងពី Bundesliga បានចាប់ផ្តើមដំណើរការប្រកួតឡើងវិញ កាលពីពាក់កណ្តាលខែឧសភា នៅក្នុងកីឡដ្ឋានដែលគ្មានអ្នកទស្សនា ដោយសារតែការរាតត្បាតរបស់វីរុសកូរ៉ូណា ខណៈដែលលោកគ្រូបង្វឹក Hansi Flick បានឈ្នះពានលីកជាលើកទី១របស់លោក សម្រាប់ការចូលកាន់តំណែងជាលើកទី២។ លោក Flick ដែលក្រុមរបស់លោក បានឈ្នះរាល់ការប្រកួតទាំង១៤លើកចុងក្រោយរបស់ខ្លួននោះ បានឲ្យដឹងថា៖ «សូមអបអរដល់ក្រុមនេះ។ វាពិតជារំភើបណាស់ចំពោះអ្វីដែលយើងធ្វើបានសម្រេច ក្នុងរយៈពេលប៉ុន្មានខែចុងក្រោយនេះ។ នៅថ្ងៃនេះ មិនមានការរិះគន់ឡើយ។ អ្នកត្រូវតែទទួលស្គាល់ចំពោះរបៀបដែលកីឡាករធ្វើបាន។ កីឡាករ គ្រូបង្វឹក និងក្រុមទាំងមូល មានការសាមគ្គីដ៏ល្អមួយ»។
លទ្ធផលនេះ ធ្វើឲ្យក្រុម Werder Bremen នៅតែស្ថិតក្នុងតំបន់កាត់ចោល ខណៈដែលនៅសល់ការប្រកួត២លើកទៀត ដើម្បីគេចផុតពីការធ្លាក់ចេញទៅកាន់ក្របខ័ណ្ឌទី២ ជាលើកដំបូង បើគិតចាប់តាំងពីឆ្នាំ១៩៨០។ ក្រុមបាតតារាង Paderborn បានរងនូវការកាត់ចេញ ក្រោយពីចាញ់ ១-០ នៅលើទឹកដីក្រុម Union Berlin ក្រោយពីការធ្វើឲ្យបាល់ចូលទីខ្លួនឯងពីកីឡាករ Ben Zolinski៕
ប្រភពព័ត៌មាន៖ Channel News Asia