បរទេស៖ ខ្សែប្រយុទ្ធ Marco Reus ប្រធានក្រុមនៃក្រុម Borussia Dortmund បាននិយាយថា ក្រុមរបស់គេបានទទួលការជឿជាក់របស់ខ្លួន ក្រោយពីរូបគេបានជួយឲ្យ Dortmund ដណ្តើមបានជ័យជម្នះយ៉ាងកក់ក្តៅក្នុងលទ្ធផល៦-០ លើក្រុម Borussia Moenchengladbach កាលពីថ្ងៃអាទិត្យ និងបានកំណត់គោលដៅសងសឹកក្នុងការប្រកួតក្របខ័ណ្ឌ Europa League ជាមួយនឹងក្រុម Rangers នៅពាក់កណ្តាលសប្តាហ៍នេះ។
ក្រោយពីក្រុម Dortmund បានស្តារមុខមាត់ពីការចាញ់ក្នុងលទ្ធផល ៤-២ ក្រោមស្នាដៃក្រុម Rangers តាមរយៈការយកឈ្នះលើក្រុម Gladbach ខ្សែប្រយុទ្ធ Reus បានឲ្យដឹងថា៖ «យើងត្រូវតែបង្ហាញប្រតិកម្មនៅថ្ងៃនេះ ហើយយើងធ្វើបាន»។ នៅមុនពេលការប្រកួតជើងទី២នៃក្របខ័ណ្ឌ Europa League របស់ពួកគេក្នុងទីក្រុង Glasgow តារាឆ្នើមរូបនេះបានបន្ថែមទៀតថា៖ «យើងដឹងថា យើងត្រូវតែឈ្នះនៅថ្ងៃព្រហស្បតិ៍ ហើយយើងទទួលបានការជឿជាក់របស់យើងមកវិញហើយពេលនេះ»។
Dortmund នៅតែតាមពីក្រោយក្រុមកំពុងនាំមុខ Bayern ៦ពិន្ទុដដែល ខណៈដែលក្រុមម្ចាស់ការពារជើងឯកមួយនេះ ក៏បានស្តារមុខមាត់ពីការជួបសប្តាហ៍ដ៏ខកចិត្តរបស់ខ្លួនផងដែរ តាមរយៈការយកឈ្នះលើក្រុម Greuther Fuerth ក្នុងលទ្ធផល ៤-១៕
ប្រភពព័ត៌មាន៖ Channel News Asia
