បរទេស៖ ខ្សែប្រយុទ្ធឆ្នើម Robert Lewandowski និង Erling Haaland នឹងត្រូវជួបគ្នាក្នុងការប្រកួតដែលអាចជាជំនួបជាលើកចុងក្រោយក្នុងក្របខ័ណ្ឌ Bundesliga ក្នុងការប្រកួតរវាងក្រុមកំពូលតារាង Bayern Munich និង Borussia Dortmund នៅថ្ងៃសៅរ៍ចុងសប្តាហ៍នេះ។
ការដណ្តើមបានជ័យជម្នះលើទឹកដីខ្លួនឯងលើក្រុមលេខ២ Dortmund នាកីឡដ្ឋាន Allianz Arena ក្នុងទីក្រុង Munich នឹងជួយឲ្យក្រុម Bayern ឈ្នះពានក្របខ័ណ្ឌ Bundesliga ជាលើកទី១០ជាប់ៗគ្នា ខណៈដែលនៅសល់ការប្រកួត៣លើកទៀត។ Lewandowski ក៏អាចលើកពាន Bundesliga ជាលើកទី១០ផងដែរ ក្នុងនោះការឈ្នះពាន៨លើកបានកើតឡើងជាមួយនឹងក្រុម Bayern ហើយ២លើកទៀតកើតឡើងជាមួយនឹងអតីតក្លិបរបស់គេ Dortmund ដែលរូបគេបានចាកចេញក្នុងឆ្នាំ២០១៤។
Haaland វ័យ២១ឆ្នាំ និង Lewandowski វ័យ៣៣ឆ្នាំ បានលេងក្នុងតួនាទីដ៏សំខាន់ក្នុងចំណោមការជួបប្រកួតគ្នាចំនួន៦លើកចុងក្រោយ ដោយក្រុម Bayern បានឈ្នះទាំង៦លើក ខណៈដែល Lewandowski បានស៊ុតបាល់បញ្ចូលទី៨គ្រាប់ ហើយ Haaland បានស៊ុតបាល់បញ្ចូលទី៥គ្រាប់។ ពួកគេគឺជាតារាឆ្នើម២នាក់របស់ពិភពលោក ដែលបានបង្កើតភាពល្បីល្បាញជាងកីឡាករផ្សេងដាច់ក្នុងក្របខ័ណ្ឌ Bundesliga ខណៈដែលលោក Hans-Joachim Watzke នាយកប្រតិបត្តិក្លិប Dortmund បានប្រាប់សារព័ត៌មាន Sport Bild ថា ពួកគេជាកីឡាករដ៏មានប្រជាប្រិយភាពបំផុតមកពីបរទេស៕
ប្រភពព័ត៌មាន៖ Channel News Asia