លោក Maurizio Sarri គ្រូបង្វឹករបស់ក្លិប Juventus បានប្រាប់ Cristiano Ronaldo មិនឲ្យបារម្ភពីការព្យាយាមការស្វែងរកទម្រង់លេងដ៏ល្អរបស់ខ្លួនត្រឡប់មកវិញក្នុងរដូវកាលនេះ តាមរយៈការបញ្ជាក់កាលពីថ្ងៃអាទិត្យថា តារាឆ្នើមអន្តរជាតិព័រទុយហ្គាល់រូបនេះ នឹងវិលទៅកាន់រកទម្រង់លេងដ៏ល្អបំផុតរបស់ខ្លួន។
ពួកគេនឹងត្រូវធ្វើការប្រកួតក្របខ័ណ្ឌ Serie A ជាលើកដំបូងរបស់ខ្លួន ក្នុងរយៈពេល៣ខែ នៅពេលប៉ះជាមួយនឹងក្រុម Bologna នៅរាត្រីថ្ងៃចន្ទនេះ ពោលគឺរយៈពេល៤ថ្ងៃ ក្រោយពីការរងបរាជ័យក្រោមស្នាដៃក្រុម Napoli ក្នុងពាន Italian Cup វគ្គផ្តាច់ព្រ័ត្រ។ ក្រុមកំពុងតែនាំមុខលើតារាងក្របខ័ណ្ឌ Serie A មួយនេះ មិនបានរកគ្រាប់បាល់បញ្ចូលទីឡើយក្នុងការប្រកួតពាន Italian Cup ទាំង២លើករបស់ខ្លួន ចាប់តាំងពីរដូវកាលរបស់អ៊ីតាលី បានវិលទៅប្រកួតវិញ ក្រោយពីការផ្អាកដោយសារតែវីរុសកូរ៉ូណា។
ក្នុងការប្រកួតលើកទី១ Juventus បានបញ្ចប់ក្នុងលទ្ធផលស្មើ ០-០ ជាមួយនឹងក្រុម AC Milan ក្នុងវគ្គពាក់កណ្តាលផ្តាច់ព្រ័ត្រ ដោយ Ronaldo បានស៊ុតបាល់ប៉េណាល់ទីមិនចូលទី និងពេលប៉ះជាមួយនឹងក្រុម Napoli នៅមុនពេលចាញ់ដោយការស៊ុតបាល់ប៉េណាល់ទី ៤-២។ លោក Sarri បានឲ្យដឹងថា៖ «ខ្ញុំបាននិយាយជាមួយនឹង Cristiano ម្តងទៀតកាលពីម្សិលមិញ។ រូបគេមិនត្រូវបារម្ភពីការជឿជាក់ឡើយ។ រូបគេមិនត្រូវបាត់បង់ការជឿជាក់ឡើយ ហើយនៅពេលដែលរូបគេវិលទៅរកភាពខ្លាំងវិញ គេនឹងក្លាយកីឡាករដ៏អស្ចារ្យបំផុតម្តងទៀត»។ Ronaldo វ័យ៣៥ឆ្នាំ បានស៊ុតបាល់បញ្ចូលទី២៥គ្រាប់សម្រាប់ក្លិប Juventus ក្នុងរាល់យុទ្ធនាការទាំងអស់ នៅរដូវកាលនេះ៕
ប្រភពព័ត៌មាន៖ Channel News Asia