បរទេស៖ លោក Erik ten Hag អ្នកចាត់ការទូទៅថ្មីរបស់ក្លិប Manchester United បាននិយាយកាលពីថ្ងៃចន្ទថា ខ្សែប្រយុទ្ធ Cristiano Ronaldo មិនមែនសម្រាប់លក់ចេញឡើយ បើទោះបីតារាឆ្នើមអន្តរជាតិព័រទុយហ្គាល់រូបនេះ បានអវត្តមានក្នុងការប្រកួតមុនបើករដូវកាលនៅប្រទេសថៃ និងអូស្ត្រាលី ក៏ដោយ។
Ronaldo បានអវត្តមានក្នុងពេលចាប់ផ្តើមប្រមូលផ្តុំហ្វឹកហាត់ ជាមួយនឹងក្រុមយក្សរបស់ក្របខ័ណ្ឌ Premier League មួយនេះ កាលពីសប្តាហ៍មុន ដោយសារតែបញ្ហាគ្រួសារ។ ខ្សែប្រយុទ្ធវ័យ៣៧ឆ្នាំរូបនេះ មិនបានធ្វើដំណើរសម្រាប់ការប្រកួតមុនបើករដូវកាលឡើយ ខណៈដែលព័ត៌មានជាច្រើនបានចេញផ្សាយថា រូបគេចង់ចាកចេញ ក្រោយពីក្លិប Man United បានខកខានក្នុងការឈ្នះកៅអីទៅលេងក្នុងក្របខ័ណ្ឌ Champions League នៅរដូវកាលក្រោយ។
នៅមុនពេលការប្រកួតមុនបើករដូវកាលជាលើកដំបូងរបស់ Man United ជាមួយនឹងក្រុម Liverpool នៅទីក្រុងបាងកក នៅថ្ងៃអង្គារនេះ (ចាប់ពីម៉ោង៨យប់តទៅ) លោក Ten Hag បាននិយាយថា៖ «យើងកំពុងតែរៀបចំផែនការសម្រាប់ Cristiano Ronaldo នៅរដូវកាលខាងមុខនេះ ហើយខ្ញុំកំពុងតែផ្តោតលើការធ្វើការជាមួយនឹងរូបគេ។ ខ្ញុំបានអានព័ត៌មានហើយ ប៉ុន្តែ អ្វីដែលខ្ញុំចង់និយាយថា Cristiano មិនមែនសម្រាប់លក់ឡើយ។ រូបគេស្ថិតក្នុងផែនការរបស់យើង ហើយយើងចង់ជោគជ័យជាមួយគ្នា»៕
ប្រភពព័ត៌មាន៖ Channel News Asia
