បរទេស៖ ខ្សែប្រយុទ្ធ Cristiano Ronaldo របសក្លិប Manchester United នឹងមិនធ្វើដំណើរជាមួយនឹងក្រុមនេះ សម្រាប់ដំណើរប្រកួតមុនបើករដូវកាលនៅប្រទេសថៃ និងអូស្ត្រាលី ឡើយ ក្រោយពីត្រូវបានផ្តល់ពេលវេលាដើម្បីធ្វើការដោះស្រាយជាមួយនឹងបញ្ហាគ្រួសាររបស់គេ។ នេះបើយោងទៅតាមប្រភពមួយនៅក្លិបស្ថិតក្នុងក្របខ័ណ្ឌ Premier League មួយនេះ កាលពីថ្ងៃព្រហស្បតិ៍។
អនាគតរបស់ខ្សែប្រយុទ្ធវ័យ៣៧ឆ្នាំរូបនេះ នៅកីឡដ្ឋាន Old Trafford កំពុងតែស្ថិតក្នុងភាពមិនច្បាស់ ក្រោយពីរូបគេបានប្រាប់ក្លិប Man United ពីបំណងរបស់គេក្នុងការចាកចេញ ដើម្បីអាចលេងក្នុងក្របខ័ណ្ឌ Champions League នៅរដូវកាលក្រោយ។ ប៉ុន្តែទោះបីជាយ៉ាងណា ប្រភពដដែល បានបញ្ជាក់ថា តារាឆ្នើមអន្តរជាតិព័រទុយហ្គាល់រូបនេះ ដែលនៅជាប់កិច្ចសន្យារយៈពេល១ឆ្នាំទៀតនោះ មិនមែនសម្រាប់លក់ចេញឡើយ។
ដំណើរប្រកួតរបស់ Man United នឹងចាប់ផ្តើមដោយត្រូវប៉ះជាមួយនឹងក្រុម Liverpool នៅទីក្រុងបាងកក នាថ្ងៃទី១២ ខែកក្កដា នៅមុនពេលការប្រកួតជាមួយនឹងក្រុម Melbourne Victory និង Crystal Palace។ ពួកគេក៏ត្រូវប្រកួតជាមួយនឹងក្រុម Aston Villa ក្នុងទីក្រុង Perth ផងដែរ នាថ្ងៃទី២៣ ខែកក្កដា។ ជាមួយគ្នានេះ មិនទាន់មានភាពច្បាស់លាស់ថា Ronaldo នឹងវិលទៅកាន់ក្រុមនេះវិញ ឬយ៉ាងណាឡើយ។ Ronaldo បានស៊ុតបាល់បញ្ចូលទី២៤គ្រាប់ ក្នុងរាល់យុទ្ធនាការទាំងអស់សម្រាប់ Man United កាលពីរដូវកាលមុន ខណៈដែលពួកគេបានអវត្តមានក្នុងក្របខ័ណ្ឌ Champions League៕
ប្រភពព័ត៌មាន៖ Channel News Asia