លោក Ole Gunnar Solskjaer បានបញ្ជាក់ថា Bruno Fernandes បាននាំយកស្មារតីឈ្នះៗ ទៅឲ្យក្លិប Manchester United ហើយ ក្រោយពីការរកបានគ្រាប់បាល់ស៊ុតបញ្ចូលទី២គ្រាប់របស់គេ បានជួយឲ្យក្រុមខ្លួនទទួលជ័យជម្នះក្នុងលទ្ធផល ៣-០ នៅលើទឹកដីក្រុម Brighton កាលពីថ្ងៃអង្គារ។
ក្រោមជំនួយដ៏ធំពី Fernandes ក្រុម Man United បានបង្ហាញពីទម្រង់លេងយ៉ាងល្អឥតខ្ចោះរបស់ខ្លួន ក្នុងរដូវកាលនេះ នាកីឡដ្ឋាន Amex។ ខ្សែប្រយុទ្ធវ័យក្មេង Mason Greenwood បានរកគ្រាប់បាល់បើកឆាកនៅតង់ទី១ ហើយ Fernandes បានបន្ថែមការនាំមុខរបស់ក្រុមខ្លួននៅមុនពេលសម្រាកតង់ទី១។ Fernandes បានស៊ុតបាល់បញ្ចូលទីម្តងទៀត នៅតង់ទី២ តាមរយៈការស៊ុតបាល់បញ្ចូលទីយ៉ាងល្អ ខណៈដែលក្រុម Man United បានឡើងឈរពីលើក្រុម Wolves ដោយសារតែមានគ្រាប់បាល់ស៊ុតបញ្ចូលទីច្រើនជាង ក្នុងចំណាត់ថ្នាក់លេខ៥ នៅលើតារាងក្របខ័ណ្ឌ Premier League។
លោក Solskjaer បានឲ្យដឹងថា៖ «Bruno បានបង្ហាញពីកម្រិតលេងយ៉ាងល្អឥតខ្ចោះ។ រូបគេបាននាំយកស្មារតីឈ្នះជាមួយនឹងរូបគេ ដោយកម្រិត៩៩% គឺមិនទាន់គ្រប់គ្រាន់ឡើយ។ វាត្រូវតែ១០០%។ ខ្ញុំមានកីឡាករដែលបង្កើតឲ្យមានការប្រែប្រួលក្នុងការប្រកួតច្រើនជាង១នាក់។ គ្រាប់បាល់ទី៣ជាគ្រាប់បាល់ក្រុមជាក្រុម។ ការមើលឃើញកីឡាករជាច្រើនកំពុងតែបោះជំហានទៅមុខ ដើម្បីបញ្ចប់គោលដៅ គឺពិតជារឿងដ៏អស្ចារ្យ។ Bruno ពិតជារកបានគ្រប់បាល់ដ៏ល្អ»៕
ប្រភពព័ត៌មាន៖ Channel News Asia