ខ្សែប្រយុទ្ធជួរមុខរបស់ក្រុមភ្នំពេញក្រោន មានការជឿជាក់ថា ក្រុមរបស់ខ្លួន នឹងនៅតែអាចស្វែងរកការឈ្នះ ដើម្បីបន្តឈរនៅលើកំពូលតារាង បើទោះបីជា ពួកគេ ត្រូវប្រឈមជាមួយក្រុមខ្លាំង វិសាខា សម្រាប់ការបើកឲ្យដំណើការវិញ នៃការប្រកួតលីកកំពូលកម្ពុជា ឆ្នាំ២០២០ នៅចុងសប្តាហ៍នេះក៏ដោយ។
តាមរយៈការប្រកួត៥លើក នៅមុនពេលអ្វីៗត្រូវបានផ្អាក ដោយសារការរីករាលដាលនៃជំងឺកូវីដ១៩នោះ ក្រុមភ្នំពេញក្រោន ធ្វើបានយ៉ាងល្អ ដោយឈ្នះ៤ និងស្មើ១ ដើម្បីឈរនៅលើកំពូលតារាង ជាបណ្តោះអាសន្ន ដោយមាន១៣ពិន្ទុ ប៉ុន្តែទីតាំងរបស់ភ្នំពេញក្រោន អាចនឹងរហូត បើសិនជាពួកគេ មិនអាចយកឈ្នះលើក្រុមវិសាខា ដែលកំពុងឈរ នៅលេខរៀងទី៣ បានទេនោះ។
ការវាយតម្លៃបែបនេះ ក៏ព្រោះតែក្រុមម្ចាស់ជើងឯកព្រះខ័នរាជស្វាយរៀង ដែលកំពុងឈរនៅលេខ២ ដោយមាន១៣ពិន្ទុ ជាមួយការឈ្នះ៤ និងស្មើ១លើកដែរនោះ ត្រូវបានគេមើលឃើញថា នឹងឈ្នះបាន៣ពិន្ទុបមន្ថែម ដោយគ្មានអ្វីត្រូវសង្ស័យនោះឡើយ ព្រោះការវិលមកកាន់វាលស្មៅ ជាថ្មីនេះ ក្រុមស្វាយរៀង ត្រូវលេងជាមួយក្រុមមានបទពិសោធក្មេងខ្ចី យុវជនបាទីអាយុក្រោម១៨ឆ្នាំ ដែលមិនទាន់មានលទ្ធភាព ក្នុងការបង្អាក់ដំណើរ ការរកគ្រាប់បាល់របស់ស្វាយរៀង បាននោះទេ។
យ៉ាងណាក៏ដោយ ខ្សែប្រយុទ្ធរបស់ភ្នំពេញក្រោន Paul Omogba បាននិយាយថា៖ «យើងបានរង់ចាំការប្រកួតធំមួយនេះ អស់រយៈពេល២ ទៅ៣ខែហើយ ក្រុមរបស់យើងពិតជារំភើបណាស់ សម្រាប់ការត្រឡប់មកវិញ នៃការប្រកួតបាល់ទាត់។ ចំពោះការប្រកួតដ៏ធំខាងមុខនេះ យើងដឹងហើយថា ក្រុមទាំង២ សុទ្ធតែមានការរៀបចំយ៉ាងល្អរៀងៗខ្លួន ព្រោះកីឡាករសុទ្ធតែល្អៗ តែដោយសារនេះជាការប្រកួតក្នុងដីរបស់យើង អ៊ីចឹងយើងនឹងធ្វើឲ្យបានល្អបំផុត តាមតែយើងអាចធ្វើបាន»។
អតីតខ្សែប្រយុទ្ធធ្លាប់លេងនៅក្លិបបឹងកេត និងណាហ្គាវើល រូបនេះ បានបន្ថែមថា៖«អ្វីដែលយើងរៀបចំនៅពេលនេះ គឺដើម្បីឈ្នះការប្រកួត និងធ្វើឲ្យបានល្អ សម្រាប់ក្រុមអ្នកគាំទ្ររបស់ពួកយើង។ ពួកយើងធ្វើការខ្លាំងណាស់ សម្រាប់ការត្រឡប់មកវិញនេះ គឺពួកយើងយកចិត្តទុកដាក់ទាំងកម្លាំង និងស្មារតី ចាប់តាំងពីយើងបានឈរនៅកំពូលតារាងមកម៉្លេះ អ៊ីចឹងយើងត្រូវតែរក្សាតំណែងរបស់យើង និងបន្តវារហូតដល់អ្វីៗបានបញ្ចប់»។
យ៉ាងណាក៏ដោយ លទ្ធផលទៅជាយ៉ាងណានោះ នៅមិនទាន់ដឹងច្បាស់នៅឡើយទេ ព្រោះក្រុមវិសាខា ក៏ត្រូវការឈ្នះខ្លាំងបំផុតដូចគ្នា ដើម្បីរក្សាទីតាំងលេខ៣របស់ពួកគេ ព្រោះបើចាញ់ ភ្នំពេញក្រោន លើកនេះ វិសាខា អាចនឹងធ្លាក់ចេញពីតំបន់ Top6 បាន ដ្បិតអីអង្គរថាយហ្គឺរ បឹងកេត ណាហ្គាវើល និងក្រុមទ័ព សុទ្ធតែមាន៨ពិន្ទុស្មើវិសាខា ខណៈការប្រកួតប្រចាំសប្តាហ៍ទី៦នេះ បឹងកេត និងអង្គរថាយហ្គឺរ សុទ្ធតែមានលទ្ធភាពខ្ពស់ ក្នុងការឈ្នះ៣ពិន្ទុ ប៉ុន្តែណាហ្គាវើល និងទ័ព អាចនឹងលំបាក ក្នុងការប្រជែងយក៣ពិន្ទុដូចគ្នា៕
