ក្រុមសិង្ហក្រហម ភ្នំពេញក្រោន ដែលទើបឈ្នះពាន ការប្រកួតពានរង្វាន់ខេមបូឌានលីគខាប់ ឆ្នាំ២០២ (Cambodian League Cup) កាលពីថ្ងៃសៅរ៍ កន្លងមកនេះ គឺពួកគេ នឹងត្រូវធ្វើដំណើរ ទៅកាន់ទឹកទីប្រទេសម៉ាឡេស៊ី នាថ្ងៃទី២ ខែមិថុនា ខាងមុខនេះ ដើម្បីចូលរួមការប្រកួតពានរង្វាន់មិត្តភាពអន្តរជាតិ និងប្រកួតមិត្តភាព នៅទីនោះ ដើម្បីពង្រឹងសមត្ថភាពបន្ថែម ត្រៀមការប្រកួតដ៏សំខាន់ នៅចំពោះមុខ។
បើទោះបីជា ភ្នំពេញក្រោន បានឈ្នះគ្រប់ការប្រកួត នៅពានរង្វាន់ Cambodian League Cup 2022 និងចុងក្រោយ បានយកឈ្នះក្រុមវិសាខា ២-១ នៅវគ្គផ្តាច់ព្រ័ត្រ ប៉ុន្តែថ្នាក់ដឹកនាំ និងក្រុមគ្រូបង្វឹករបស់សិង្ហក្រហម ចង់ឱ្យ ភ្នំពេញក្រោន ទទួលបានបទពិសោធថ្មីៗបន្ថែម សម្រាប់ការប្រកួត នៅក្រៅប្រទេសវិញម្តង ព្រោះពួកគេ ចង់ធ្វើឱ្យមានភាពប្រាកដថា ភ្នំពេញក្រោន ពិតជាត្រៀមខ្លួនបានល្អ១០០ភាគរយ មុនការប្រកួតវគ្គចែកពូល AFC Cup 2022 ឈានចូលមកដល់។
សម្រាប់ការប្រកួតពានរង្វាន់ International Club Friendly Match 2022 ដែល រៀបចំឡើងដោយក្លិបបាល់ទាត់ Terengganu របស់ម៉ាឡេស៊ី សហការជាមួយក្រុមហ៊ុន Echo Sports Management នេះ គឺក្រុមភ្នំពេញក្រោន របស់កម្ពុជា នឹងត្រូវធ្វើការប្រកួត២លើកជាមួយក្រុម Terengganu ដោយលើកទី១ ធ្វើនៅថ្ងៃទី៤ និងលើកទី២ នៅថ្ងៃទី៦ ខែមិថុនា ដើម្បីដណ្តើមយកពានមិត្តភាពអន្តរជាតិនេះ។
នៅក្រោយការប្រកួតដណ្តើមពានមិត្តភាពអន្តរជាតិនេះ គឺនៅព្រឹកថ្ងៃទី៨ ខែមិថុនា ក្រុមសិង្ហក្រហម ភ្នំពេញក្រោន នឹងត្រូវប្រកួតមិត្តភាពអន្តរជាតិជាមួយក្រុមជើងខ្លាំង Kuala Lampur City ដែលជាក្រុមកំពុងលេង នៅលីគកំពូលម៉ាឡេស៊ី ដែរ មុនពេលពួកគេ ត្រឡប់មកមាតុភូមិវិញ។
សម្រាប់ការចេញទៅប្រកួត នៅប្រទេសម៉ាឡេស៊ីនេះ វាបានក្លាយជាផ្នែកមួយយ៉ាងសំខាន់ របស់ក្រុមភ្នំពេញក្រោន ដើម្បីត្រៀមការប្រកួតសំខាន់ នៅចំពោះមុខ គឺវគ្គចែកពូល ពានរង្វាន់ AFC Cup 2022 ដោយ ភ្នំពេញក្រោន ស្ថិតក្នុងពូល I ជាមួយ Veittel FC របស់វៀតណាម Houngang United របស់សិង្ហបុរី និង Young Elephants United របស់ឡាវ ហើយការប្រកួតនេះ នឹងចាប់ផ្ដើមការប្រកួតពីថ្ងៃទី២៤ ដល់ថ្ងៃទី៣០ ខែមិថុនា ឆ្នាំ២០២២ ដោយប្រកួតនៅទីក្រុងហូជីមិញ ប្រទេសវៀតណាម៕
