ខ្សែប្រយុទ្ធជនជាតិអាហ្គានីស្ថាន Fareed Sadat បាននឹងកំពុងអន្ទះសារ ចង់បង្ហាញសមត្ថភាព និងចង់ឃើញពីទិដ្ឋភាពជាក់ស្តែង នៃអ្នកគាំទ្រដ៏ស្មោះស្ម័ក្ររបស់ ភ្នំពេញក្រោន ដែលជាក្លិបដំបូងគេ បាននាំយករូបគេ មកកាន់ទឹកដីកម្ពុជា ដើម្បីប្រកបអាជីពបាល់ទាត់ នៅទីនេះ។
ក្រុមសិង្ហក្រហម ភ្នំពេញក្រោន បានប្រកាសពីការចុះកិច្ចសន្យាជាមួយខ្សែប្រយុទ្ធកម្ពស់១,៨៨ ម៉ែត្រ Fareed Sadat កាលពីថ្ងៃទី៤ ខែកុម្ភៈនេះ ហើយគេក៏ជាកីឡាករបរទេសទី៥ចុងក្រោយ ដែលក្លិបភ្នំពេញក្រោន បាននាំយកមក ដើម្បីលេងនៅរដូវកាល ឆ្នាំ២០២២នេះផងដែរ។
នៅក្នុងបទសម្ភាសផ្ទាល់ជាមួយក្លិបភ្នំពេញក្រោន នៅថ្ងៃអង្គារនេះ Fareed Sadat បានបង្ហាញការពេញចិត្ត ទៅលើអ្វីគ្រប់យ៉ាង នៅក្នុងក្លិបថ្មីមួយនេះ ហើយកីឡាករបានចាប់អាជីពបាល់ទាត់ នៅប្រទេសហ្វាំងឡង់រូបនេះ បានបង្ហាញពីឆន្ទៈ ក្នុងការជួយសម្រេចគោលដៅថ្មីជាមួយក្រុមភ្នំពេញក្រោន សម្រាប់ការប្រកួតពានរង្វាន់ AFC Cup 2022។
កីឡាករវ័យ២៣ឆ្នាំ Fareed Sadat បាននិយាយថា៖ «ខ្ញុំមានអារម្មណ៍ល្អ និងចូលចិត្តមិត្តរួមក្រុម និងគ្រូបង្វឹក ព្រោះនេះ គឺជាបទពិសោធន៍ថ្មីមួយសម្រាប់ខ្ញុំ ដែលវាជារឿងល្អ ហើយខ្ញុំសប្បាយចិត្ត ដែលបានមកដល់ទីនេះ ដើម្បីជួយក្រុមឱ្យទទួលគោលដៅថ្មី បន្ថែមទៀត ជាពិសេស គឺការប្រកួតពានរង្វាន់ AFC CUP។ ខ្ញុំក៏អន្ទះសារចង់ឃើញអ្នកគាំទ្ររបស់ក្លិបដូចគ្នា!»។
សម្រាប់ការប្រកួតពានរង្វាន់ AFC Cup 2022 ក្រុមភ្នំពេញក្រោន បានឈរនៅពូលI ជាមួយក្រុមជើងឯករបស់វៀតណាម Viettel FC និងក្រុមលីគកំពូលរបស់សិង្ហបុរី ហើយក្រោយពីកីឡាករចំណូលថ្មី Fareed Sadat នេះ ក្រុមភ្នំពេញក្រោន បានដាក់ការសង្ឃឹមទៅដល់កីឡាករជប៉ុន Yudai Ogawa និង Ose Takaki ខ្សែបម្រើប្រយុទ្ធជនជាតិកូឡុំប៊ី Andre Nieto និងខ្សែប្រយុទ្ធអ៊ុយក្រែន Valeriy Hryshyn ដែលបរទេសទាំង៤នេះ ជាអ្នករួមចំណែកយ៉ាងសំខាន់ ក្នុងការជួយឱ្យក្រុមភ្នំពេញក្រោន បានឈ្នះបានលីគកំពូលកម្ពុជា ឆ្នាំ២០២១ ដើម្បីទទួលបានកៅអី លេងនៅក្នុងការប្រកួតពានរង្វាន់ AFC Cup 2022 នេះ៕
