ក្រុមម្ចាស់ជើងឯកលីគកំពូលកម្ពុជា ភ្នំពេញក្រោន បានសម្រេចបន្តកុងត្រាឱ្យកីឡាករឆ្នើមវ័យក្មេង ក្នុងស្រុកចំនួន ៤ នាក់ រហូតដល់ឆ្នាំ២០២៤ និង៣២០២៥ ហើយក្រុមសិង្ហក្រហម ក៏បានរក្សាទុកខ្សែប្រយុទ្ធជនជាតិអ៊ុយក្រែន Valeriy Hryshyn ដើម្បីបន្តរួមចំណែកជួយដល់ក្រុម សម្រាប់ការប្រកួតរដូវកាលថ្មី ឆ្នាំ២០២២ នេះផងដែរ។
តាមការប្រកួត នៅលើផេចហ្វេសប៊ុកផ្លូវការរបស់ខ្លួន កាលពីចុងសប្តាហ៍ និងថ្ងៃចន្ទ ម្សិលមិញ ភ្នំពេញក្រោន បានសម្រេចបន្តកុងត្រាដល់ម្ចាស់ស្រោមដៃមាសឆ្នាំ ២០២១ សាវែង សំណាង រួមទាំងខ្សែបម្រើឆ្នើម យ៉ើ ម៉ូស្លីម និង ជួន ចាន់ចាវ រហូតដល់ឆ្នាំ ២០២៥ ហើយក្រុមនេះ ក៏បានសម្រេចបន្តកុងត្រាដល់ខ្សែបម្រើកណ្តាលជាប្រធានក្រុម អ៊ន ចាន់ប៉ូលីន ដល់ឆ្នាំ ២០២៤ ផងដែរ។
ជាមួយគ្នានេះ កីឡាករ សឿត បារាំង ដែលបានទៅលេងឱ្យក្លិបអង្គរថាយហ្គឺរ ក្នុងលក្ខខណ្ឌខ្ចីជើង កាលពីឆ្នាំ ២០២១ និងអ្នកចាំទី គង់ ចាន់វុទ្ធី ដែលបានទៅលេងឱ្យក្លិបគិរីវង់សុខសែនជ័យក្នុងលក្ខខណ្ឌខ្ចីជើងកាលពី ឆ្នាំមុនដែរនោះ ក៏បានវិលត្រឡប់មកលេងឱ្យភ្នំពេញក្រោន នៅរដូវកាលនេះផងដែរ ប៉ុន្តែកីឡាករកូនខ្មែរ-បារាំង ប៉ាក់ កែវម៉ូនី បានសម្រេចចែកផ្លូវជាមួយ ភ្នំពេញក្រោនហើយ។
ទន្ទឹមជាមួយគ្នានេះ ភ្នំពេញក្រោន កាលពីថ្ងៃចន្ទ បានសម្រេចបន្តកុងត្រាដល់ខ្សែប្រយុទ្ធជនជាតិអ៊ុយក្រែន Valeriy Hryshyn រហូតដល់ចប់ឆ្នាំ២០២២នេះ ហើយតាមរយៈការប្រកាសនេះ បានឱ្យដឹងថា ភ្នំពេញក្រោន បានរក្សាទុកកីឡាករបរទេស ដែលបានជួយក្រុមឱ្យលើកពាន កាលពីឆ្នាំ២០២១ រហូតដល់៤នាក់ គឺមានតែខ្សែប្រយុទ្ធប្រេស៊ីល Matheuse ម្នាក់ទេ ដែលបានចែកផ្លូវជាមួយ ភ្នំពេញក្រោន ចំណែកកីឡាករជប៉ុន Yudai Ogawa និង Ose Takaki រួមទាំងខ្សែបម្រើប្រយុទ្ធជនជាតិកូឡុំប៊ី Andre Nieto សុទ្ធតែបានបន្តកុងត្រាជាមួយភ្នំពេញក្រោន រហូតដល់ចប់ ឆ្នាំ២០២២ ដូចគ្នា។
ការរក្សាទុកកីឡាករបរទេសឆ្នើមៗទាំង៤ខាងលើនេះ រួមទាំងការបន្តកុងត្រារយៈពេលវែងដល់កីឡាករវ័យក្មេង សាវែង សំណាង, យ៉ើ ម៉ូស្លីម, ជួន ចាន់ចាវ និង អ៊ន ចាន់ប៉ូលីន នេះ គឺភ្នំពេញក្រោន មិនមែនត្រៀមតែសម្រាប់ការប្រកួតលីគកំពូលកម្ពុជា ឆ្នាំ២០២២ ប៉ុណ្ណោះទេ ប៉ុន្តែរឿងដែលសំខាន់បំផុតនោះ គឺត្រៀមសម្រាប់ការប្រកួតពានរង្វាន់ AFC Cup 2022 វគ្គជម្រុះក្នុងពូលតំបន់អាស៊ាន (ASEAN ZONE) នាពេលខាងមុខនេះ៕