ក្រុមម្ចាស់ជើងឯកលីគកំពូលកម្ពុជា ឆ្នាំ២០២១ ភ្នំពេញក្រោន បានដឹងច្បាស់ហើយពីបេក្ខភាពទាំង៣ក្រុម ដែលពួកគេត្រូវប្រកួតប្រជែង នៅក្នុងវគ្គចែកពូល (Group Stage) នៃពានរង្វាន់ AFC Cup 2022 ប្រចាំតំបន់អាស៊ាន (ASEAN Zone) ដែលនឹងចាប់ដំណើរការប្រកួត នៅថ្ងៃទី២៤ ខែមិថុនា ខាងមុខនេះ។
តាមរយៈការចាប់ឆ្នោតបែកចែកពូលទាំង៣ រវាងក្រុមទាំង១២ នៅក្នុងតំបន់អាស៊ាន ដែលមានសិទ្ធិ បានចូលរួមនៅក្នុងវគ្គ Group Stage នេះ កាលពីថ្ងៃចន្ទ បានបង្ហាញថា ក្រុមភ្នំពេញក្រោន បានស្ថិតនៅក្នុងពូលI ជាមួយក្រុមលេខ១ Viettel FC របស់វៀតណាម ព្រមទាំងក្រុម Hougang United (Hougang United FC) របស់សិង្ហបុរី និងក្រុម Hantharwady United FC របស់មីយ៉ាន់ម៉ា។
ចំណែកពូល H ក៏បានបង្ហាញពីបេក្ខភាពទាំង៤ក្រុម ដែលត្រូវប្រកួតប្រជែងគ្នារួចរាល់ផងដែរ ប៉ុន្តែសម្រាប់ពូលG ទើបតែមាន៣ក្រុមទេ ចំណែក១ក្រុមទៀត អាចជាក្រុមវិសាខា របស់កម្ពុជា ឬក្រុម Young Elephant របស់ឡាវ ព្រោះក្រុមទាំង២នេះ នឹងត្រូវលេងវគ្គជម្រុះ Playoff ហើយក្រុមដែលឈ្នះ ត្រូវឡើងទៅពូល G នេះ។
តាមរយៈលទ្ធផលនៃការចាប់ឆ្នោតនេះ លោក កែវ សុខង៉ន អ្នកចាត់កាតរទូទៅក្រុមភ្នំពេញក្រោន បានមើលឃើញថា ក្រុមលេខ១ Viettel FC របស់វៀតណាម គឺជាក្រុមដែលមានអាទិភាពខ្ពស់ជាងគេ ក្នុងការឈ្នះបានកៅអី ឡើងទៅប្រកួតនៅវគ្គបន្ត។ «សម្រាប់ខ្ញុំ ក្រុមដែលមានអាទិភាព នឹងឡើងទៅវគ្គបន្ត គឺក្រុម viettel FC របស់វៀតណាម»។
តែទោះបីជាយ៉ាងណា អ្នកចាត់ការទូទៅវ័យក្មេងរូបនេះ នៅតែមានក្តីរំពឹងថា ក្រុមសិង្ហក្រហម នឹងអាចប្រជែងបានកៅអីមួយផងដែរ នៅវគ្គបន្ត។ អតីកីឡាករជម្រើសជាតិកម្ពុជា កែវ សុខង៉ន បានប្រាប់វេបសាយក្នុងស្រុកមួយថា៖ «ប៉ុន្តែសម្រាប់ ភ្នំពេញក្រោន យើងបានរៀបចំរួចរាល់ផងដែរ ហើយយើងនឹងព្យាយាមឱ្យអស់លទ្ធភាព ដើម្បីឆ្លងផុតពីវគ្គ Group Stage នេះ»៕