ខ្សែប្រយុទ្ធ Lionel Messi ត្រូវបានគេរាយការណ៍កាលពីថ្ងៃព្រហស្បតិ៍ថា តារាឆ្នើមរូបនេះកំពុងតែរៀបចំផែនការក្នុងការចាកចេញពីក្លិប Barcelona នៅឆ្នាំ២០២១ ប៉ុន្តែ លោក Zinedine Zidane គ្រូបង្វឹករបស់ក្លិប Real Madrid សង្ឃឹមថា Messi នឹងបន្តនៅក្នុងប្រទេសអេស្ប៉ាញ។
កិច្ចសន្យានាពេលបច្ចុប្បន្នរបស់ Messi នឹងផុតកំណត់នៅឆ្នាំក្រោយ ហើយរូបគេបានផ្អាកការចរចាផ្សេងៗ ដោយសារតែការខកចិត្តទៅនឹងថ្នាក់ដឹកនាំរបស់ក្លិប។ នេះបើយោងទៅតាមការចេញផ្សាយរបស់ស្ថានីយ៍វិទ្យុអេស្ប៉ាញ Cadena Ser។
Barca កំពុងតែស្ថិតក្នុងចំណាត់ថ្នាក់លេខ២ នៅលើតារាង La Liga ខណៈដែលនៅសល់ការប្រកួត៥លើកទៀត ដោយដេញតាមពីក្រោយក្រុម Real Madrid ៤ពិន្ទុ ក្រោយពីពួកគេបានផ្តួលក្រុម Getafe ក្នុងលទ្ធផល ១-០ កាលពីថ្ងៃព្រហស្បតិ៍ ដើម្បីស្ថិតកាន់តែកៀកឆ្ពោះទៅកាន់ការឈ្នះពាន។ នៅពេលដែលត្រូវបានចោទសួរអំពីលទ្ធភាពដែល Messi នឹងត្រូវចាកចេញ លោក Zidane គ្រូបង្វឹកក្លិប Real បានឲ្យដឹងថា៖ «ខ្ញុំមិនដឹងពីអ្វីដែលបានកើតឡើងឡើយ ប៉ុន្តែ យើងសង្ឃឹមថា មិនមែនដោយសារតែរូបគេស្ថិតក្នុងលីកនេះឡើយ ហើយយើងចង់បានភាពល្អប្រសើរបំផុតក្នុងក្របខ័ណ្ឌលីកនេះ»។
Messi បាននិយាយកាលពីខែកុម្ភៈថា រូបគេមិនជឿជាក់ថា Barcelona អាចឈ្នះពានក្របខ័ណ្ឌ Champions League ជាមួយនឹងទម្រង់លេងនាពេលបច្ចុប្បន្នឡើយ៕
ប្រភពព័ត៌មាន៖ Channel News Asia