បរទេស៖ បើយោងទៅតាមបញ្ជីរបាយការណ៍ប្រចាំឆ្នាំរបស់ទស្សនាវដ្តី Forbes ដែលបានចេញផ្សាយកាលពីថ្ងៃពុធ ខ្សែប្រយុទ្ធ Lionel Messi បានក្លាយជាអត្តពលិកដែលរកបានចំណូលច្រើនជាងគេបំផុត កាលពីឆ្នាំមុន ក្រោយពីតារាឆ្នើមរបស់ក្លិប Paris Saint-Germain ឡើងឈរពីលើកីឡាករបាល់បោះ LeBron James របស់ក្របខ័ណ្ឌ NBA និងខ្សែប្រយុទ្ធ Cristiano Ronaldo របស់ក្លិប Manchester United។
Messi រកបានចំណូល១៣០លានដុល្លារអាមេរិក ក្នុងនោះក៏រាប់បញ្ចូលទីប្រាក់ចំណូលពីការឧបត្ថម្ភនានាចំនួន៥៥លានដុល្លារអាមេរិក ផងដែរ អំឡុងរយៈពេល១២ខែ ដែលបញ្ចប់ត្រឹមថ្ងៃទី១ ខែឧសភា ឆ្នាំ២០២២ ដើម្បីឈរលើកំពូលតារាង ក្នុងចំណោមអត្តពលិកទាំង១០ដែលរកបានចំណូលខ្ពស់ជាងគេ ក្នុងរយៈពេល១ឆ្នាំ ក្រោយពីបានបញ្ចប់ក្នុងចំណាត់ថ្នាក់លេខ២ បន្ទាប់ពីកីឡាករគុនចម្រុះ Conor McGregor។
ខ្សែប្រយុទ្ធ James របស់ក្លិប Los Angeles Lakers ស្ថិតក្នុងចំណាត់ថ្នាក់លេខ២ ក្រោយពីរកបានចំណូលសរុប១២១លានដុល្លារអាមេរិក ដើម្បីបំបែកកំណត់ត្រាខ្លួនឯង ក្រោយពីរកបាន៩៦,៥លានដុល្លារអាមេរិក កាលពីឆ្នាំមុន ស្របពេលដែលខ្សែប្រយុទ្ធអន្តរជាតិព័រទុយហ្គាល់ Ronaldo រកបានចំណូល១១៥លានដុល្លារ ដើម្បីស្ថិតក្នុងចំណាត់ថ្នាក់លេខ៣។ ខ្សែប្រយុទ្ធអន្តរជាតិប្រេស៊ីល Neymar (ដែលរកបាន៩៥លានដុល្លារ) និងកីឡាករ Stephen Curry ម្ចាស់ជើងឯកក្របខ័ណ្ឌកីឡាបាល់បោះ NBA ដែលរកបាន៩២,៨លានដុល្លារ បានបំពេញចំណាត់ថ្នាក់កំពូលទាំង៥៕
ប្រភពព័ត៌មាន៖ Channel News Asia