បរទេស៖ ខ្សែប្រយុទ្ធ Neymar បានស៊ុតបាល់បញ្ចូលទី២គ្រាប់ ស្របពេលដែល Lionel Messi ក៏បានស៊ុតបាល់បញ្ចូលទីផងដែរ ខណៈដែលក្រុម Paris Saint-Germain បានផ្តួលក្រុម Nantes យ៉ាងចាស់ដៃក្នុងលទ្ធផល ៤-០ ក្នុងការប្រកួតពាន Champions Trophy ក្នុងទីក្រុង Tel Aviv កាលពីថ្ងៃអាទិត្យ ក្នុងការប្រកួតផ្លូវការជាលើកដំបូងរបស់លោកគ្រូបង្វឹកថ្មី Christophe Galtier។
ក្រោយពីជួបការខកចិត្តក្នុងរដូវកាលទី១របស់គេក្នុងកីឡាបាល់ទាត់បារាំ Messi បានស៊ុតបាល់បំប៉ោងសំណាញ់ទី នៅនាទី ទី២២ ក្នុងការប្រកួតដណ្តើមពានបើករដូវកាល ដែលត្រូវបានរៀបចំឡើងនៅប្រទេសអ៊ីស្រាអែល ជាលើកទី២ជាប់ៗគ្នា។ Neymar ដែលអនាគតរបស់គេក្នុងក្លិបនេះ បានស្ថិតក្នុងភាពមិនច្បាស់ដោយសារតែពាក្យចរចាមអារ៉ាមនានា នៅរដូវក្តៅនេះ បានបន្ថែមគ្រាប់បាល់នាំមុខនៅមុនពេលបញ្ចប់តង់ទី១ តាមរយៈការស៊ុតបាល់ពិន័យ Free-kick បញ្ចូលទីយ៉ាងល្អ។
ខ្សែការពារ Sergio Ramos បានបន្ថែមគ្រាប់បាល់ទី៣ ហើយ Neymar រកបានគ្រាប់បាល់ទី២របស់គេ ពីការស៊ុតបាល់ប៉េណាល់ទី ខណៈដែលក្រុម PSG ដែលជាម្ចាស់ជើងឯកក្របខ័ណ្ឌ Ligue 1 បានយកឈ្នះលើក្រុមម្ចាស់ជើងឯក French Cup កាលរដូវកាលមុនយ៉ាងងាយស្រួល។ នេះគឺជាលើកទី៩ក្នុងចំណោម១០រដូវកាលចុងក្រោយ ដែលក្រុម PSG បានលើកពាន Champions Trophy។ កាលពី១ឆ្នាំមុន ពួកគេបានរងបរាជ័យក្រោមស្នាដៃក្រុម Lille ក្នុងលទ្ធផល ១-០ នៅលើទីលានដូចគ្នា៕
ប្រភព័ត៌មាន៖ Channel News Asia
