បរទេស៖ Paris Saint-Germain បានតាមស្មើកំណត់ត្រារបស់បារាំង តាមរយៈការឈ្នះពានក្របខ័ណ្ឌ Ligue 1 ជាលើកទី១០ ដើម្បីតាមស្មើឯកទគ្គកម្មនេះ ដែលត្រូវបានបង្កើតឡើងដោយក្រុម Saint-Etienne របស់ Michel Platini ប៉ុន្តែ ការសម្រេចបាននូវសមិទ្ធផលជាប្រវត្តិសាស្ត្រដោយកម្របែបនេះ ក្នុងកីឡាបាល់ទាត់ ហាក់មិនផ្តល់នូវភាពរំភើបខ្លាំងឡើយ។
ភាពរំភើបនានា ហាក់មិនមានកម្រិតខ្លាំងឡើយ ដោយសារតែម្ចាស់គ្រប់គ្រងពាន Ligue 1 ត្រូវបានបង្ហាញឲ្យឃើញរួចជាស្រេច ក្រោយពីក្រុម PSG បានឈ្នះរាល់ការប្រកួតទាំង៨លើកដំបូងរបស់ពួកគេ ដើម្បីនាំមុខចំនួន៩ពិន្ទុ ដាច់លើកំពូលតារាង នៅត្រឹមចុងខែកញ្ញា។ ជាមួយគ្នានេះ ការឈ្នះត្រឹមតែពានក្នុងស្រុក ក៏មិនសក្តិសមទៅនឹងសមត្ថភាពរបស់ក្រុម PSG ផងដែរ ក្រោយពីក្លិបនាំបាននាំយក Lionel Messi និងបានច្រានចោលសំណើដេញតម្លៃក្នុងទំហំទឹកប្រាក់១៨០លានអឺរ៉ុប (ស្មើនឹង១៩៥លានដុល្លារអាមេរិក) ពីក្លិប Real Madrid សម្រាប់ Kylian Mbappe នៅឆ្នាំចុងក្រោយនៃកិច្ចសន្យារបស់គេ។
លោក Mauricio Pochettino បានទទួលស្គាល់ថា៖ «ការឈ្នះពានក្របខ័ណ្ឌ Champions League គឺជាគោលដៅគ្រឹះសម្រាប់ Paris Saint-Germain ហេតុនេះ វាតែងតែជារឿងដ៏ខកចិត្ត ប្រសិនបើយើងមិនបានឈ្នះ»។ ប៉ុន្តែ ទោះបីជាយ៉ាងណា ការផ្តោតអារម្មណ៍របស់ពួកគេនៅពេលនេះ គឺការរក្សាទុក Mbappe ដែលអាចនឹងចាកចេញដោយគ្មានតម្លៃ បន្ទាប់ពីបញ្ចប់រដូវកាលនេះ៕
ប្រភពព័ត៌មាន៖ Channel News Asia