បរទេស៖ ខ្សែប្រយុទ្ធដ៏មានឥទ្ធិពល Kylian Mbappe បាននិយាយថា រូបគេនៅតែមិនទាន់ធ្វើការសម្រេចចិត្តលើអនាគរបស់គេនៅក្លិប Paris Saint-Germain នៅឡើយទេ ក្រោយពីបានស៊ុតបាល់បញ្ចូលទី២គ្រាប់ ជាមួយនឹងការបង្ហាញពីទម្រង់លេងយ៉ាងល្អ ក្នុងពេលក្រុមខ្លួនបានយកឈ្នះលើក្រុម Lorient ក្នុងលទ្ធផល ៥-១ ក្នុងការប្រកួតក្របខ័ណ្ឌ Ligue 1 កាលពីថ្ងៃអាទិត្យ។
តារាឆ្នើមអន្តរជាតិបារាំងរូបនេះ បានស្ថិតក្នុងទម្រង់លេងយ៉ាងមុតស្រួច តាមរយៈការជួយឲ្យ Neymar រកបាន២គ្រាប់ និងជួយឲ្យ Lionel Messi រកបាន១គ្រាប់ទៀត ខណៈដែលកីឡាករទាំង៣សុទ្ធសឹងបានស៊ុតបាល់បញ្ចូលទីក្នុងការប្រកួតតែ១ដូចគ្នាសម្រាប់ PSG ជាលើកដំបូង។ ប៉ុន្តែ ទោះបីជាយ៉ាងណា ការចាប់អារម្មណ៍បន្ទាប់ពីការប្រកួតត្រូវបានផ្លាស់ប្តូរភ្លាមៗទៅលើកន្លែងដែល Mbappe នឹងត្រូវទៅលេងឲ្យនារដូវកាលក្រោយ ខណៈដែលកិច្ចសន្យារបស់គេជាមួយនឹងក្លិប PSG នឹងផុតកំណត់នៅខែកក្កដា។
Mbappe បានប្រាប់ទូរទស្សន៍ Prime Video ថា៖ «ខ្ញុំមិនទាន់ធ្វើការជ្រើសរើសនៅឡើយទេ។ ខ្ញុំមិនទាន់សម្រេចចិត្តរបស់ខ្ញុំនៅឡើយទេ។ ខ្ញុំកំពុងតែគិត ព្រោះមានធាតុផ្សំ និងមានកត្តាជាច្រើន។ ខ្ញុំមិនចង់សម្រេចចិត្តខុសឡើយ។ ខ្ញុំដឹងថា វានឹងយឺតបន្តិចសម្រាប់គ្រប់គ្នា ព្រោះយើងនិយាយពីបញ្ហានេះជារៀងរាល់ថ្ងៃ»៕
ប្រភពព័ត៌មាន៖ Channel News Asia
