លោក Jose Mourinho បានវាយបកទៅកាន់ការចំអករបស់ក្រុម Arsenal ចំពោះការរងបរាជ័យរបស់ក្រុម Tottenham នៅលើទឹកដីក្រុម Sheffield United នៅលើបណ្តាញសង្គម តាមរយៈការនិយាយថា «អ្នកចេះតែសប្បាយចិត្តនៅលើគំនរទុក្ខអ្នកដ៏ទៃប៉ុណ្ណោះ ស្របពេលដែលអ្នកក៏កំពុងតែមានបញ្ហាផងដែរ»។
ការរងបរាជ័យក្នុងលទ្ធផល ៣-១ របស់ក្រុម Spurs នាកីឡដ្ឋាន Bramall Lane កាលពីថ្ងៃព្រហស្បតិ៍ បានកើតឡើង ត្រឹមតែប៉ុន្មានថ្ងៃប៉ុណ្ណោះ ក្រោយពីក្រុម Arsenal បានផ្តួលក្រុម Sheffield United ក្នុងលទ្ធផល ២-១ ដើម្បីឈានទៅប្រកួតពាន FA Cup វគ្គពាក់កណ្តាលផ្តាច់ព្រ័ត្រ។ ក្រុមកាំភ្លើងធំមួយនេះ បានសើចចំអកឲ្យគូប្រជែងក្នុងទីក្រុងឡុងដ៍របស់ខ្លួន នៅលើ Facebook នៅពេលដែលពួកគេបានបង្ហាញរូបភាពនៃជ័យជម្នះរបស់ខ្លួន ដោយមានការសរសេរចំណងជើងថា៖ «វាមិនងាយស្រួលឡើយក្នុងការផ្តួលក្រុម Sheffield United នៅកីឡដ្ឋាន Bramall Lane»។
ការដណ្តើមបានជ័យជម្នះ៣លើកជាប់ៗគ្នាក្នុងការប្រកួតលីក ជួយឲ្យក្រុម Arsenal នាំមុខ៤ពិន្ទុពីលើក្រុម Tottenham ដែលនឹងត្រូវប៉ះជាមួយនឹងក្រុម Everton នៅថ្ងៃចន្ទនេះ។
Tottenham និង Arsenal នឹងត្រូវប៉ះគ្នានៅថ្ងៃអាទិត្យ ទី១២ ខែកក្កដា ហើយលោក Mourinho សង្ឃឹមថា ក្រុមខ្លួនអាចសងសឹកនៅលើទីលានបាន។ លោក Mourinho បានឲ្យដឹងថា៖ «ខ្ញុំគិតថា ប្រសិនបើពួកគេឈរលើកំពូលតារាង ឬកំពុងតែប្រជែងដណ្តើមលេខ៤ ក្នុងពេលវេលាដ៏រីករាយ ពួកគេមិនគួរសប្បាយចិត្តលើគំនរទុក្ខអ្នកដទៃឡើយ។ អ្នកចេះតែរីករាយលើគំនរទុក្ខអ្នកដទៃប៉ុណ្ណោះ ស្របពេលដែលអ្នកក៏កំពុងតែមានបញ្ហាដូចគ្នា»៕
ប្រភពព័ត៌មាន៖ Channel News Asia
