លោក Brendan Rodgers បានលើកទឹកចិត្តឲ្យក្រុម Leicester ប្រជែងយកកៅអីទៅលេងក្នុងក្របខ័ណ្ឌ Champions League បើទោះបីធ្លាក់ចុះទម្រង់លេងនៅជិតបញ្ចប់រដូវកាលនៃក្របខ័ណ្ឌ Premier League ក៏ដោយ។
ក្រុមដែលមានរហស្សនាមថា ចចកកំណាចមួយនេះ នឹងធ្វើដំណើរទៅកាន់ទឹកដីក្រុម Arsenal នៅរាត្រីនេះ ខណៈដែលពួកគេនឹងត្រូវប្រជែងយកកៅអីទៅកាន់ក្របខ័ណ្ឌកំពូលរបស់អឺរ៉ុប ជាលើកទី១ បើគិតចាប់តា17C6ងពីរដូវកាលឆ្នាំ២០១៦-២០១៧។
Leicester កំពុងតែស្ថិតក្នុងចំណាត់ថ្នាក់លេខ៣ នៅលើតារាងក្របខ័ណ្ឌ Premier League ក្រោយពីបានយកឈ្នះក្នុងលទ្ធផល ៣-០ លើក្រុម Crystal Palace ដើម្បីបញ្ចប់ការមិនស្គាល់ឈ្នះសោះត្រឹម៤ប្រកួតជាប់ៗគ្នា ក្នុងរាល់យុទ្ធនាការទាំងអស់ បើគិតចាប់តាំងពីការផ្អាកការប្រកួតដោយសារតែវីរុសកូរ៉ូណា។
លោក Rodgers ជឿជាក់ថាក្រុមរបស់លោកអាចបញ្ចប់ក្នុងចំណាត់ថ្នាក់កំពូលទាំង៤ម្តងទៀត បើទោះបីស្ថិតក្នុងការប្រជែងយ៉ាងស្វិតស្វាញជាមួយនឹងក្រុមឈរលេខ៥ Manchester United ដែលកំពុងតែដេញតាមពីក្រោយពួកគេត្រឹមតែ៣ពិន្ទុក៏ដោយ។
លោក Rodgers បានឲ្យដឹងថា៖ «វាច្បាស់ណាស់ថា យើងបានបង្ហាញពីទេពកោសល្យរបស់យើងក្នុងការប្រកួត៣៣លើករួចមកហើយ។
ពិតណាស់ យើងអាចនឹងអវត្តមានកីឡាករមួយចំនួន ប៉ុន្តែ ក្នុងនាមជាក្រុមមួយ យើងពិតជាផ្តោតទៅលើការសម្រេចឲ្យបានគោលដៅនោះ ហើយយើងនឹងប្រយុទ្ធរហូតដល់សំឡេងកញ្ចែចុងក្រោយ»។ លោកបានបន្ថែមទៀតថា៖ «អ្វីដែលកីឡាករបានធ្វើ គឺពិតជាអស្ចារ្យ។ ខ្ញុំជឿជាក់លើសមត្ថភាពនោះ»៕
ប្រភពព័ត៌មាន៖ Channel News Asia
