ក្រុមខេត្តកណ្តាល និងខេត្តកោះកុង នឹងប្រឹងទឹកដីរបស់ខ្លួន ដើម្បីស្វាគមន៍ក្រុមខេត្តសៀមរាប និងខេត្តព្រៃវែង វិញ ក្នុងការប្រកួតកាត់សេចក្តីជើងទី២ វគ្គ៨ក្រុមចុងក្រោយ ពានរង្វាន់សម្តេច ហ៊ុន សែន លើកទី១៤ (ថ្នាក់ខេត្ត) ឆ្នាំ២០២០ នៅរសៀលម៉ោង៣ ថ្ងៃអង្គារនេះ។
នៅក្នុងការប្រកួតកាត់សេចក្តីនេះ ក្រុមម្ចាស់ផ្ទះខេត្តកណ្តាល អាចនឹងប្រើកីឡដ្ឋានខេត្តកណ្តាលរបស់ខ្លួន ដើម្បីវាយបកទៅលើក្រុមខេត្តសៀមរាបវិញ។ បើទោះបីជា ខេត្តកណ្តាល បានចាញ់ក្រុមខេត្តសៀមរាប នៅក្នុងការប្រកួតជើងទី១ ប៉ុន្តែការចាញ់ត្រឹម ៣-១ វានៅមិនទាន់បិទផ្លូវក្រុមខេត្តកណ្តាល នៅឡើយទេ។
សម្រាប់ការប្រកួតជើងទី១ កន្លងមក ក្រុមម្ចាស់ផ្ទះ ខេត្តសៀមរាប និងខេត្តកណ្តាល បានធ្វើការវាយបកគ្នាទៅវិញទៅមក ដោយក្នុងនោះ ខេត្តសៀមរាប បានបង្កើតឱកាសស៊ុតចំនួន១២ដង ខុសគោលដៅ៩ និងចំគោលដៅបាន៣ ខណៈខេត្តកណ្តាល បង្កើតឱកាសស៊ុតបាន៩ ខុសគោលដៅ៦ និងស៊ុតត្រូវគោលដៅ៣ ហើយតាមស្ថិតិនេះ ខេត្តកណ្តាល អាចនឹងមានប្រៀបលើ ខេត្តសៀមរាប វិញ សម្រាប់ការប្រកួតនៅលើទឹកដីរបស់ពួកគេ លើកនេះ។
ចំណែកក្រុមខេត្តកោះកុង នឹងបើកកីឡដ្ឋានវិទ្យាល័យកោះកុង ដើម្បីស្វាគមន៍ក្រុមខេត្តព្រៃវែង នៅរសៀលម៉ោង៣ ថ្ងៃអង្គារនេះដូចគ្នា ប៉ុន្តែ ខេត្តកោះកុង ហាក់មិនរំពឹង អាចវាយបកទៅលើក្រុមខេត្តព្រៃវែង នោះទេ ព្រោះការប្រកួតជើងទី១ កន្លងមកនេះ ខេត្តព្រៃវែង បានឈ្នះរហូតដល់ ៥-១ ឯណោះ។
បន្ថែមលើការមានគ្រាប់បាល់នាំមុខចំនួន៤នេះ ខេត្តព្រៃវែង ដែលកីឡាករស្ទើរតែទាំងអស់ ជាក្រុមយុវជនរបស់ក្លិបវិសាខា នោះ គឺមានទម្រង់លេងល្អ ជាងក្រុមខេត្តកោះកុង ដាច់តែម្តង ខណៈការប្រកួតជើងទី១ ក្នុងទឹកដី កន្លងមកនេះ ពួកគេ បង្កើតឱកាសស៊ុតបាន២១គ្រាប់ ខុសគោលដៅ១១គ្រាប់ និងចំគោលដៅ១០គ្រាប់ ផ្ទុយពីនេះ ខេត្តកោះកុង បង្កើតឱកាសស៊ុតបានត្រឹម២ដង ខុសគោលដៅ១ និងត្រូវគោលដៅ១ដងគត់ ហើយតាមស្ថិតិនេះ អាចបង្ហាញបានថា ខេត្តកោះកុង គេចមិនផុតពីការធ្លាក់ក្រោមស្នាដៃ ក្រុមខេត្តព្រៃវែង នោះទេ៕
