ក្រុមធំ វិសាខា បានបន្តយកឈ្នះលើក្រុមខេត្តត្បូងឃ្មុំ សម្រាប់ការប្រកួតបញ្ចប់ជម្រុះវគ្គ១៦ក្រុមចុងក្រោយ នៃពានរង្វាន់សម្តេច ហ៊ុន សែន ឆ្នាំ២០២០ របស់ខ្លួន កាលពីថ្ងៃពុធ ចំណែកក្រុមយុវជនវិសាខា ដែលលេងតំណាងឲ្យខេត្តព្រៃវែង នឹងត្រូវប្រឈមជាមួយម្ចាស់ផ្ទះ កងយោធពលខេមរភូមិន្ទ (ទ័ព) នៅកីឡដ្ឋានស្តាតចាស់ នាល្ងាចម៉ោង៦ ថ្ងៃព្រហស្បិ៍នេះ។
សម្រាប់ការប្រកួត នៅទីលានវិទ្យាល័យព្រះសីហនុខេត្តកំពង់ចាម កាលពីម្សិលមិញនោះ ក្រុមវិសាខា បានវាយបកយកឈ្នះក្រុមខេត្តត្បូងឃ្មុំ ត្រឹម ៤-១ ដោយក្នុងនោះកីឡាករពាក់លេខ៩៩ ប៊ុនធឿន ប៊ុនណារ៉ុង រកបាន៣គ្រាប់តែម្នាក់ឯង នៅនាទីទី៣០ ព្រមទាំងនាទីទី៦៩ និងទី៨៥ ដែលជាការស៊ុតបាល់ពិន័យ១១ម៉ែត្រ បានសម្រេច ខណៈ១គ្រាប់ទៀតរកបានដោយ ទិត ឌីណា នៅនាទីទី៨៣ ចំណែកគ្រាប់បាល់នាំមុខរបស់ក្រុមខេត្តត្បូងឃ្មុំ ធ្វើបានសម្រេចដោយកីឡាករ យូ សុះហ្វា នៅនាទីទី១០។
ការឈ្នះត្រឹម ៤-១ គឺវាមានកម្លាតឆ្ងាយពីជ័យជម្នះ ដែលក្រុមវិសាខា ធ្វើបាន នៅក្នុងការប្រកួតក្នុងទឹកដី ដោយពួកគេបានលត់ខេត្តត្បូងឃ្មុំ ៩-០។ យ៉ាងណាក៏ដោយ សម្រាប់ការប្រកួតនៅក្រៅទឹកដីនេះ វិសាខា បានដាក់កីឡាករ ស្ថិតក្នុងជម្រើសទី២ឲ្យលេងភាគច្រើន ខណៈខ្សែប្រយុទ្ធជួរមុខ កែវ សុខផេង, រ៉ឹង ប៊ុនហៀង ព្រមទាំង ស៊ិន កក្កដា និង ស៊ិន សុផាណាត់ ដែលធ្លាប់រកបាន៣គ្រាប់ដូចគ្នា នាការប្រកួតនៅក្នុងទឹកដី សុទ្ធតែមិនត្រូវបានដាក់ឲ្យលេង នៅក្នុងជម្រើស១១នាក់ដំបូងនោះ។
ការទុកកីឡាករល្អៗ ឲ្យស្ថិតនៅក្នុងបញ្ជីឈ្មោះបម្រុង ពេលប្រកួតជាមួយក្រុមខេត្តត្បូងឃ្មុំ នេះ គឺ វិសាខា ខ្លាចកីឡាករល្អៗរបស់ខ្លួន មានបញ្ហារបួស ហេតុនេះទើបក្លិបមួយនេះ ឲ្យអ្នកទាំងនោះ បានសម្រាករក្សាកម្លាំងឲ្យបានពេញលេញ ដើម្បីត្រៀមប្រកួតវគ្គ៨ក្រុមចុងក្រោយ ជើងទី១ ជាមួយក្រុមម្ចាស់ជើងឯក បឹងកេត នៅកីឡដ្ឋានខេមបូឌាអ៊ែរវ៉េ នារសៀលម៉ោង ៣:៣០ ថ្ងៃអាទិត្យ។
ដោយឡែកក្រុមយុវជនវិសាខា ដែលលេងតំណាងឲ្យខេត្តព្រៃវែង និងត្រូវធ្វើការប្រកួតជើងទី១ វគ្គ៨ក្រុមចុងក្រោយ ជាមួយក្រុមទ័ព នៅល្ងាចម៉ោង៦ ថ្ងៃព្រហ្បតិ៍នេះ ហើយវាក៏ជាពេលដែល ក្រុមយុវជនមួយនេះ ត្រូវប្រឈមការប្រកួតដ៏តានតឹង ជាមួយក្រុមមានមូលដ្ឋានរឹងមាំ នៅស្តាតចាស់ផងដែរ។
សម្រាប់ការប្រកួតវគ្គជម្រុះ១៦ក្រុម កន្លងមកនេះ ក្រុមទ័ព បានលត់ក្រុមខេត្តកែប ជាមួយការឈ្នះគ្រាប់បាល់សរុបទាំង២ជើង ១៤-៣ ប៉ុន្តែការទម្លាក់ក្រុមអង្គរថាយហ្គឺរ ជាមួយការឈ្នះ ៣-២ ក្នុងជើងទី១ និងស្មើគ្នា ២-២ ក្នុងជើងទី២នោះ អាចបង្ហាញឲ្យឃើញថា ក្រុមយុវជនវិសាខា អាចប្រកួតប្រជែងជាមួយក្រុមទ័ព យ៉ាងតានតឹងបាន ព្រោះពួកគេ មិនត្រឹមតែមានសមត្ថភាពលេង នៅលើទីលានប៉ុណ្ណោះទេ ប៉ុន្តែថែមទាំងមានការយល់ចិត្តគ្នា និងលេងបានស៊ីចង្វាក់គ្នាទៀតផង៕
