សមាគមកីឡាបាល់ទាត់មន្ទីរអយកខេត្តត្បូងឃ្មុំ បានចេញលិខិតអំពាវនាវមួយ ដើម្បីសុំឱ្យថ្នាក់ដឹកនាំ រួមទាំងអ្នកមានមុខមាត់ និងទ្រពសម្បត្តិ នៅក្នុងខេត្តរបស់ខ្លួន មេត្តាចូលរួមជួយឧបត្ថម្ភដល់ក្រុមរបស់ខ្លួន ដើម្បីអាចមានលទ្ធភាពឈានទៅដណ្តើមបានលទ្ធផលល្អ ពេលប្រកួតផ្តាច់ព្រ័ត្រ ដណ្តើមពានរង្វាន់សម្តេចហ៊ុនសែន (ថ្នាក់ខេត្ត) ឆ្នាំ២០២១ ជាមួយក្រុមកោះកុងអេហ្វស៊ី នៅកីឡដ្ឋានខេមបូឌាអ៊ែរវ៉េ នារសៀលម៉ោង៣ ថ្ងៃសៅរ៍នេះ។
យោងតាមលិខិតអំពាវនាវរបស់មន្ទីរអប់រំ យុវជន និងកីឡា ខេត្តត្បូងឃ្មុំ គឺបានស្នើសុំដល់ថ្នាក់ដឹកនាំគ្រប់ស្រទាប់ជាន់ថ្នាក់ រួមទាំងក្រុមហ៊ុន និងស្ថាប័នផ្សេងៗ ឱ្យចូលរួមជួយឧបត្ថម្ភទាំងថិវកា ឬសម្ភារ ដល់ក្រុមខេត្តត្បូឃ្មុំ ដើម្បីជួយជ្រោមជ្រែងលើការស្នាក់នៅ ហូបចុក បានល្អ និងអាចមានប្រាក់ យកទៅផ្តល់ជូនគ្រូបង្វឹក និងក្រុមកីឡាករ ត្រៀមការប្រកួយតដណ្តើមយកពាននេះ ហើយក៏សូមឱ្យអ្នកនៅខេត្តត្បូងឃ្មុំ ចូលរួមទស្សនាការប្រកួតផ្តាច់ព្រ័ត្រនេះ តាមរយៈការផ្សាយផ្ទាល់ នៅលើកញ្ចក់ទូរទស្សន BTV ផងដែរ។
ផ្ទុយពីនេះ គ្រូបង្វឹកក្រុមកោះកុងអេហ្វស៊ី លោក ហុក សុជីវ័ន បានបង្ហាញពីការបារម្ភ ទៅលើហានិភ័យនៃជំងឺកូវីដ១៩ ដែលអាចនឹងឆ្លង នៅក្នុងការប្រកួតផ្តាច់ព្រ័ត្រនេះ បើសិនជាក្រុមណាមួយ ព្យាយាមលាក់បាំងករណីនេះ ដើម្បីឱ្យកីឡាកររបស់ខ្លួន បានចូលលេង ដោយផ្តោតខ្លាំងតែទៅលើការដណ្តើមពាន ហើយមិនបានគិតគូរ ដោយបញ្ហាសុខភាព និងអាយុជីវិតរបស់អ្នកពាក់ព័ន្ធនោះ។
ជុំវិញបញ្ហានេះ លោក ហុក សុជីវ័ន បានសរសេរបង្ហោះ កាលពីថ្ងៃព្រហស្បតិ៍ថា៖«ដំណាក់កាលនេះ ពានឣ្នកណាក៏ចង់បានដែរ តែសុខភាពសំខាន់ជាងពានទៅទៀត ព្រោះអា១៩ (ជំងឺកូវីដ១៩) អាចងាយសម្លាប់មនុស្សបាន។ ខ្ញុំសំណូមពរតែម្យ៉ាងទេ បើកីឡាករមានកូវីដ កុំព្យាយាមលាក់ ដើម្បីបានលេង ព្រោះពេលខ្លះការចំលង គ្រាន់តែមិនទាន់ចេញរោគសញ្ញាតែប៉ុណ្ណោះ ព្រោះវាផ្តល់ផលប៉ះពាល់ដល់ឣ្នកដទៃខ្លាំងណាស់»។
អតីតគ្រូបង្គោលក្រុមវិសាខា លោក សុជីវ័ន បានបន្ថែមថា៖ «មាន១ វាអាចចៃដន្យ តែបើឡើង៨ ទៅ១០នាក់ហើយ មិនមែនចៃដន្យទេ ហើយការព្យាបាលអាចប្រើរយៈពេល៣ ឬ៤ ឬ ៥ថ្ងៃ តេស្តក៏បាត់វិញ តែត្រូវតែចត្តាឡីស័ក ឱ្យបានគ្រប់ចំនួន។ ៣ការពារ ៣កុំ ធ្វើជាមនុស្ស ត្រូវមានគុណធម៌»។
យ៉ាងណាក៏ដោយ គិតមកដល់ពេលនេះ គណៈកម្មការរៀបចំការប្រកួត នៅមិនទាន់បានចេញសេចក្តីប្រកាសណាមួយ ព័ន្ធពាក់នឹងករណីកូវីដ១៩ ដែលកើតមានឡើង ចំពោះក្រុមទាំង២នេះ នៅឡើយទេ ប៉ុន្តែកាលប្រកួតវគ្គពាក់កណ្តាលផ្តាច់ព្រ័ត្រកន្លងមកនេះ គណៈកម្មការ បានប្រកាសលុបចោលការប្រកួតរវាងក្រុមខេត្តត្បូងឃ្មុំ និងក្រុមខេត្តបាត់ដំបង ភ្លាមៗ ក្រោយធ្វើសេត្តរកឃើញថា កីឡាកររបស់ខេត្តបាត់ដំបង បានវិជ្ជមានជំងឺកូវីដ ដល់ទៅ២លើកនោះ។
ការរកឃើញករណីឆ្លងជំងឺកូវីដនោះ គណៈកម្មការ បានសម្រេចឱ្យក្រុមខេត្តត្បូងឃ្មុំ ទទួលបានជ័យជម្នះ លើក្រុមខេត្តបាត់ដំបង ដោយស្វ័យប្រវត្តិ តាមច្បាប់ ដែលបានកំណត់ ប៉ុន្តែក្រុមកោះកុងអេហ្វស៊ី បានយកឈ្នះក្រុមខេត្តបន្ទាយមានជ័យ ១-០ ទាំងលំបាក ដើម្បីឡើងមកកាន់ ការប្រកួតវគ្គផ្តាច់ព្រ័ត្រ នៅពេលនេះ៕