ក្រុមសូលទីឡូអង្គរ ហាក់បានដឹងរួចទៅហើយថា ពួកគេមិនអាចនឹងប្រជែងយកឈ្នះលើក្រុមព្រះខ័នរាជស្វាយរៀង បាននោះទេ សម្រាប់ការជួបគ្នា ក្នុងការប្រកួតថ្នាក់ជាតិវគ្គជម្រុះ១៦ក្រុម នៃពានរង្វាន់សម្តេចហ៊ុនសែន លើកទី១៤ ឆ្នាំ២០២០ ខណៈការជួបគ្នាជើងទី១ នៅល្ងាចម៉ោង៦ថ្ងៃនេះ សូលទីឡូអង្គរ ក៏កំពុងជួបបញ្ហារឿងកីឡាកររបួសច្រើននាក់ ផងដែរ។
លោក ជា ម៉េងលី អ្នកចាត់ការទូទៅក្រុមសូលទីឡូអង្គរ បាននិយាយថា៖«យើងអាចមានការលំបាក ចំពោះការប្រកួតនេះ ព្រោះកីឡាករជម្រើស១១នាក់ដំបូងរបស់យើង របួស៣ទៅ៤នាក់ ហើយយើងក៏បានដាក់កីឡាករក្មេងៗឲ្យចូលលេងច្រើនផងដែរ ខណៈស្វាយរៀង ជាក្រុមខ្លាំង»។
លោកបានបន្ថែមថា៖ «ឱកាសរបស់យើងគឺ ៥០/៥០ ព្រោះក្មេងរបស់យើងហ៊ានលេងដែរ ហើយគោលដៅរបស់យើង គឺផ្តល់ឱកាសឲ្យក្មេងៗរបស់យើងមកពី U18 បានលេង តែយើងព្យាយាម ធ្វើម៉េចការពារកុំឲ្យគេស៊ុតបញ្ចូលទីច្រើនគ្រាប់។ យើងតែងចង់បានលទ្ធផលល្អ ប៉ុន្តែធ្វើម៉េចយើងចាប់ឆ្នោតប៉ះក្រុមខ្លាំង ដែលយើងពិបាករំពឹងថា នឹងបានឆ្លងទៅវគ្គបន្តទៀត»។
ចំណែកក្រុមព្រះខ័នរាជស្វាយរៀង ដែលធ្លាប់ឈ្នះពាននេះរហូតដល់៤លើក រួមទាំងការឈ្នះតំណែងជើងឯករងបាន៣លើកទៀតនោះ បានមើលឃើញថា ពួកគេមានប្រៀបជាងក្រុមសូលទីឡូអង្គរ ក្នុងការទទួលបានជ័យជម្នះ ក្នុងការប្រកួតនេះ។
លោក ជូ សារឿន គ្រូជំនួយក្រុមស្វាយរៀង បានប្រាប់ថា៖ «ការជួបក្រុមសូលទីឡូអង្គរ នៅក្នុងវគ្គ១៦ក្រុមនេះ ខ្ញុំគិតថា វាមិនជាតានតឹងនោះទេ ដោយសារកីឡាករក្នុងស្រុករបស់គាត់ មានកម្រិតលេងមិនជាល្អប៉ុន្មានទេ ដែលភាគច្រើនជាក្មេងរបស់ខេត្តសៀមរាប»។
លោកបានធ្វើការប្រៀបធៀបយ៉ាងដូច្នេះថា៖«កីឡាកររបស់យើង មានបទពិសោធលេងយូរឆ្នាំមកហើយ អ៊ីចឹងយើងខ្លាំងជាងក្រុមសូលទីឡូអង្គរ ប៉ុន្តែយើងក៏បានបញ្ចូលកីឡាករវ័យក្មេងមកពីក្រុម U19 មួយចំនួនផងដែរ ចំណែកការរៀបចំលេង អាចប្រែប្រួល ទៅតាមស្ថានភាពជាក់ស្តែង ព្រោះមិនទាន់ដឹងថា ការប្រកួតនេះ នឹងអាចរំខានដល់ការភ្លៀងឬយ៉ាងណានោះទេ»។
ដោយឡែក ក្រុមបឹងកេត នឹងត្រូវជួបក្រុមម្ចាស់ផ្ទះ ខេត្តសៀមរាប នៅកីឡដ្ឋានខេត្តសៀមរាប នារសៀលម៉ោង៣:៣០ នៅថ្ងៃព្រហស្បតិ៍នេះដែរ ហើយនៅក្នុងជំនួបជើងទី១នេះ បឹងកេត ត្រូវបានគេមើលឃើញថា នឹងទទួលបានជ័យជម្នះ ដោយសារមានកម្រិតលេងខ្ពស់ជាង ហើយបឹងកេត ក៏មានមហិច្ឆតាខ្ពស់ ក្នុងការឈ្នះ ដើម្បីបន្តទៅរក្សាតំណែងជើងឯករបស់ពួកគេផងដែរ។
ចំណែកការប្រកួតជើងទី១ រវាងក្រុមម្ចាស់ផ្ទះ ខេត្តត្បូងឃ្មុំ និងក្រុមខ្លាំង វិសាខា ដែលគ្រោងធ្វើនៅរសៀលថ្ងៃនេះដែរ ត្រូវបានពន្យារពេលហើយ ដោយសារទីលានវិទ្យាល័យប៊ុនរ៉ានីហ៊ុនសែនមេមត់ ថ្មីៗនេះ មានស្ថានភាពគុណភាពមិនល្អដូចជា ផ្ទៃមិនរាបស្មើ ខ្វះស្មៅ និងខូង មិនគ្រប់លក្ខខណ្ឌបច្ចេកទេស ដែលអាចនឹងរៀបចំឲ្យក្រុមទាំង២ អាចប្រកួតគ្នាបាន៕