មន្រ្តីគណៈកម្មការប្រកួតបាល់ទាត់កម្ពុជា (CNCC) បានឱ្យដឹងថា ការប្រកួតថ្នាក់ខេត្តពានរង្វាន់សម្តេច ហ៊ុន សែន ឆ្នាំ២០២១ ដែលបានផ្អាកការប្រកួត ដោយសារការរីករាលនៃជំងឺកូវីដ១៩ តាំងពីដើមខែមេសា មកនោះ នឹងត្រូវចាប់ដំណើរការប្រកួតឡើងវិញ នៅថ្ងៃទី៣ ខែសីហា ខាងមុខនេះ។
យ៉ាងណាក៏ដោយ សម្រាប់ការប្រកួតឡើងវិញនេះ គឺមានតែក្រុមចំនួន១០ប៉ុណ្ណោះ ដែលបានស្ម័គ្រចិត្តចូលរួមបន្ត ចំណែកក្រុមចំនួន១១ទៀត បានសម្រេចចិត្តបង់ចោលការប្រកួតតែម្តង ដោយសារស្ថានភាពការរីករាលជំងឺកូវីដ នៅតាមតំបន់របស់ក្រុមទាំងនោះ នៅតែជាហានិភ័យខ្ពស់ មិនអាចនឹងរៀបចំការប្រកួតបាន។
តាមមន្រ្តីរបស់ CNCC បានបញ្ជាក់ថា ក្រុមទាំង១០ ដែលបានសម្រេចចិត្តបន្តការប្រកួតថ្នាក់ខេត្តពានរង្វាន់សម្តេច ហ៊ុន សែន ឆ្នាំ២០២១នេះ រួមមាន សៀមរាបអេហ្វស៊ី កោះកុង ភ្នំពេញហ្គាឡាក់ស៊ី កំពង់ឆ្នាំង បាត់ដំបង បន្ទាយមានជ័យ ឧត្តរមានជ័យ កណ្ដាល កំពត និងក្រុមខេត្តត្បូងឃ្មុំ ចំណែកក្រុមចំនួន២១ទៀត បានសម្រេចចិត្តបោះបង់ការប្រកួតតែម្តង បើទោះបីជាការប្រកួតជម្រុះតាមពូលទាំង៦ សរុបមាន២១ក្រុម បានដំណើរជិតចប់ទៅហើយក៏ដោយ។
តាមរយៈការបោះបង់ចោលការប្រកួតរបស់ក្រុមទាំង ១១ នេះ CNCC និងតំណាងក្រុមទាំង១០ ដែលបានចូលរួម បានសម្រេចកែប្រែរួមមន្តប្រកួត នៅក្នុងកិច្ចប្រជុំតាមអនឡាញ កាលពីម្សិលមិញ ដោយក្នុងនោះ CNCC បានសម្រេចកំណត់យកក្រុមឈរនៅលេខ១ និងក្រុមមានតែមួយ នៅក្នុងពូល (ក្រុមផ្សេងបោះបង់) ឡើងទៅកាន់ការប្រកួតវគ្គ៨ក្រុមចុងក្រោយតែម្តង។
ចំណែកក្រុមលេខ២ នៅតាមពូល ដែលមានត្រឹម៤ក្រុមនោះ ត្រូវប្រកួតខ្វែង ហើយក្រុមឈ្នះចំនួន២ ត្រូវឡើងទៅប្រកួតនៅវគ្គ៨ក្រុមដែរ ហើយនៅក្នុងវគ្គ១/៤ផ្តាច់ព្រ័ត្រនេះ ត្រូវប្រកួតជម្រុះចាញ់ធ្លាក់ៗ រហូតរកឃើញក្រុមខ្លាំងទាំង២ ឡើងទៅប្រកួតវគ្គផ្តាច់ព្រ័ត្រ ដែលគ្រោងធ្វើនៅថ្ងៃសៅរ៍ ទី២១ ខែសីហា។
យ៉ាងណាក៏ដោយ សម្រាប់ការប្រកួតសាជាថ្មីនៃពានរង្វាន់សម្តេចហ៊ុនសែន (ថ្នាក់ខេត្ត) នេះ នឹងប្រព្រឹត្តទៅដោយគោរពតាមវិធានរបស់គណៈកម្មការប្រកួតបាល់ទាត់ជាតិកម្ពុជា ដែលតម្រូវឱ្យមានការតេស្ដរហ័ស (Rapid Test) រាល់មុនការប្រកួត និងក្រុមប្រតិបត្តិរបស់គណៈកម្មការផងដែរ៕
