ក្រុមតោខៀវ Chelsea បានឡើងទៅឈរក្នុងចំណាត់ថ្នាក់លេខ៣ នៅលើតារាងនៃក្របខ័ណ្ឌ Premier League ក្រោយពីបានរក្សាការនាំមុខរបស់ខ្លួន ដើម្បីកត់ត្រាជ័យជម្នះដ៏រំភើបក្នុងលទ្ធផល ៣-២ នៅលើទឹកដីក្រុម Crystal Palace ស្របពេលដែលក្រុម Leicester បានទទួលលទ្ធផលស្មើ ១-១ នៅលើទឹកដីក្រុម Arsenal ដែលនៅសល់សមាជិកត្រឹមតែ១០នាក់ កាលពីថ្ងៃអង្គារ។
ក្រុមរបស់លោក Frank Lampard ស្ថិតកាន់តែកៀកក្នុងការឈ្នះកៅអីទៅលេងក្នុងក្របខ័ណ្ឌ Champions League នារដូវកាលក្រោយ ខណៈដែលការដណ្តើមបានជ័យជម្នះជាលើកទី៧ក្នុងចំណោមការប្រកួត៨លើក ធ្វើឲ្យពួកគេនាំមុខ១ពិន្ទុលើក្រុម Leicester និងនាំមុខ៥ពិន្ទុលើក្រុមឈរលេខ៥ Manchester United។
ក្រុមតោខៀវ បានជួបសំណាងភ្លាមៗ តាមរយៈការរកគ្រាប់បាល់បើកឆាកនៅកីឡដ្ឋាន Selhurst Park ខណៈដែល Gary Cahill អតីតខ្សែការពាររបស់ក្លិប Chelsea បានដួលនៅលើទីលានប្រកួត ដោយសារតែបញ្ហាសរសៃពួគន្លាក់ជើង ដែលអនុញ្ញាតឲ្យ Willian បញ្ជូនបាល់យ៉ាងល្អទៅឲ្យ Olivier Giroud ដើម្បីរកគ្រាប់បាល់ទី៤របស់គេ ក្នុងចំណោមការប្រកួត៦លើក។
ទម្រង់លេងដ៏ល្អរបស់ខ្សែបម្រើ Christian Pulisic បើគិតចាប់តាំងពីចាប់ផ្តើមប្រកួតឡើងវិញរបស់ក្របខ័ណ្ឌ Premier League បាននាំឲ្យមានការប្រៀបធៀបទៅនឹងតារាឆ្នើម Eden Hazard ដែលជាកីឡាកររូបគេបានជំនួសកន្លែងនៅកីឡដ្ឋាន Stamford Bridge ហើយតារាឆ្នើមអន្តរជាតិអាមេរិកវ័យ២១ឆ្នាំរូបនេះ បានស៊ុតបាល់បញ្ចូលទីយ៉ាងល្អដើម្បីបន្ថែមការនាំមុខរបស់ក្រុមខ្លួន។
ប្រភពព័ត៌មាន៖ Channel News Asia