ក្រុមខេត្តព្រៃវែង នៅតែរក្សាបានភាពខ្លាំង ក្នុងការបន្តយកឈ្នះលើក្រុមខេត្តកោះកុង ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រនៃពានរង្វាន់សម្តេច ហ៊ុន សែន លើកទី១៤ (ថ្នាក់ខេត្ត) ឆ្នាំ២០២០ ចំណែកអ្នកចាំទី ភេម សាវុត បានក្លាយជាវីរបុរស ក្នុងការសង្រ្គោះក្រុមខេត្តសៀមរាប ឲ្យគេចផុតពីភាពហ្មងសៅ ខណៈពួកគេ គ្មានលទ្ធភាពអាចរក្សាការមានប្រៀបលើក្រុមខេត្តកណ្តាលនោះ។
សម្រាប់ការប្រកួត នៅលើទឹកដីខ្លួនឯង កាលពីថ្ងៃអង្គារ ម្សិលមិញនេះ ក្រុមម្ចាស់ផ្ទះ កណ្តាល បានបង្ហាញលេងយ៉ាងល្អ។ ថ្វីបើខ្សែបម្រើ គង់ ស្រស់ បានស៊ុតបាល់ពិន័យ១១ម៉ែត្រ បានសម្រេចឲ្យក្រុមខេត្តសៀមរាប នៅនាទីទី២៦ ដើម្បីបន្ថែមទៅលើការយកឈ្នះ ៣-១ សម្រាប់ការប្រកួតជើងទី១ ប៉ុន្តែខេត្តកណ្តាល បានវាយបករកបាន៣គ្រាប់ដ៏គួរឲ្យភ្ញាក់ផ្អើល។
ខ្សែបម្រើ សាក់ សំណាង ជាអ្នករកបានគ្រប់បាល់តាមស្មើឲ្យក្រុមខេត្តកណ្តាល នៅនាទីទី៣៥ ហើយខ្សែបម្រើ ណាត សង្ហា និង ប៊ិច សុធារ៉ា ជាអ្នករកបានគ្រាប់បាល់ជ័យជម្នះ តាមរយៈការរកបានគ្រាប់បាល់របស់ពួកគេម្នាក់១គ្រាប់ នៅនាទីទី៥៦ និងទី៦៦ ហើយការមានគ្រាប់បាល់ស្មើគ្នា ៤-៤ សម្រាប់ការប្រកួតទាំង២ជើងនេះ បានធ្វើឲ្យក្រុមទាំង២ ឈានដល់ការទាត់បាល់ប៉េណាល់ទីកាត់សេចក្តី ដើម្បីរកក្រុមឈ្នះ ឡើងទៅវគ្គបន្ត។
នៅក្នុងដំណាក់កាលដ៏គួរឲ្យរន្ធត់នេះ អ្នកចាំទីពាក់លេខ២២ ភេម សាវុត បានក្លាយជាវីរបុរស ក្នុងការជួយសង្រ្គោះក្រុមខេត្តសៀមរាប ដោយក្នុងនោះរូបគេបានលោតទះបាល់ពីការស៊ុតរបស់កីឡាករ គង់ និមល និង ហេង បូរ៉ា បានយកជោគជ័យ ខណៈ ចាន់ បូរម៉ី បានស៊ុតបាល់បាញ់ចាប ឡើងទៅលើ គឺមានតែ ម៉ែន សបញ្ញា ម្នាក់គត់ ដែលសុទ្ធបានសម្រេចឲ្យខេត្តកណ្តាល។
ផ្ទុយពីនេះកីឡាករ គយ នរៈសក្តា, ហេង បូរ៉ា និង ស៊ុំ សាន់ របស់ខេត្តសៀមរាប សុទ្ធតែធ្វើបានសម្រេច មុនពេលប្រធានក្រុម ម៉ម រ៉ាវុទ្ធី សុទ្ធបាល់ខុសគោលដៅ ហើយការយកឈ្នះដោយបាល់ប៉េណាល់ទី ៣-១ បានជួយឲ្យក្រុមខេត្តសៀមរាប ឡើងទៅកាន់វគ្គពាក់កណ្តាលផ្តាច់ព្រ័ត្រយ៉ាងរំភើបបំផុត។
ជាមួយការជួយក្រុមខេត្តសៀមរាប ឡើងទៅវគ្គបន្តនេះ អ្នកចាំទីលេងសក់ ភេម សាវុត បាននិយាយក្រោយការប្រកួតថា៖«ខ្ញុំសប្បាយចិត្ត និងអរខ្លាំងណាស់ ព្រោះខ្ញុំខំមកពីសៀមរាប់ ដើម្បីជ័យជម្នះមួយនេះ ហើយការប្រកួតក្រោយៗ ខ្ញុំនឹងធ្វើឲ្យបានល្អជាងនេះទៀត»។
ចំណែកខ្សែបម្រើពាក់លេខ២៨ គង់ និមល ដែលជាអ្នកស៊ុតបាល់បើកឆាកមិនបានសម្រេចឲ្យក្រុមខេត្តកណ្តាលនោះ បានសម្តែងការខកចិត្តខ្លាំង និងបាននិយាយថា៖«ខ្ញុំពិតជាមានការសោកស្តាយ ដែលធ្វើបាល់១១ម៉ែត្រ មិនបានសម្រេច ហើយខ្ញុំសូមទោសថ្នាក់ដឹកនាំ និងមិត្តរួមក្រុមទាំងអស់ ដែលខ្ញុំបានបង្កើតកំហុស នៅថ្ងៃនេះ»៕
