ក្រុមខេត្តកំពង់ស្ពឺ គ្រោងនឹងលេងដោយមិនខ្លាចការប៉ះទង្គិច ដើម្បីវាយបកទៅលើក្រុមខេត្តត្បូងឃ្មុំ សម្រាប់ការប្រកួតកាត់សេចក្តីជើងទី២ នៃពានរង្វាន់សម្តេច ហ៊ុន សែន លើកទី១៤ (ថ្នាក់ខេត្ត) ឆ្នាំ២០២០ នៅរសៀលម៉ោង៣ ថ្ងៃពុធនេះ ចំណែកក្រុមខេត្តកំពង់ឆ្នាំង ក៏នឹងប្រើទឹកដី ដើម្បីវាយបកទៅលើខេត្តកែប ផងដែរ ប៉ុន្តែក្រុមខេត្តព្រៃវែង និងខេត្តសៀមរាប បានកក់កៅអីនៅវគ្គពាក់កណ្តាលផ្តាច់ព្រ័ត្ររួចហើយ។
សម្រាប់ការប្រកួតជើងទី២ នៅក្រៅទឹកដីនេះ លោក ម៉ុល មរកត គ្រូបង្គោលក្រុមខេត្តកំពង់ស្ពឺ បានទទួលស្គាល់ ការចាញ់ក្រុមខេត្តត្បូងឃ្មុំ ២-០ សម្រាប់ការប្រកួតជើងទី១នៅក្នុងទឹកដីខ្លួនឯង កន្លងមកនេះ វាធ្វើឲ្យក្រុមរបស់លោក នៅសល់ភាគរយមិនច្រើនទេ ក្នុងការវាយបកទៅលើខេត្តត្បូងឃ្មុំវិញ ប៉ុន្តែលោកបានមើលឃើញថា ការចាញ់កន្លងមកនេះ ដោយសារកូនក្រុមលោក លេងមិនយល់ចិត្តគ្នា និងមិនសូវហ៊ានលេង ដោយការប៉ះទង្គិច។
លោក ម៉ុល មរកត បានប្រាប់ថា៖«កាលជើងទី១ កីឡាកររបស់យើង លេងអត់យល់ចិត្តគ្នាទេ ប៉ុន្តែជើងទី២នេះ ខ្ញុំគិតថា ពួកគាត់ នឹងលេងស៊ីចង្វាក់គ្នា អ៊ីចឹងយើងនៅមានសង្ឃឹម៥០ភាគរយ ក្នុងការវាយបក គឺយើងនឹងព្យាយាមឲ្យអស់ពីសមត្ថភាព»។
គ្រូបង្វឹករូបនេះ បានបន្ថែមថា៖«មួយវិញទៀត ការនាំឲ្យយើងចាញ់ ក្នុងជើងទី១ ដោយសារកីឡាកររបស់យើង លេងខ្លាចប៉ះទង្គិច អ៊ីចឹងធ្វើឲ្យក្រុមរបស់គេ ងាយស្រួលក្នុងការលេង ប៉ុន្តែលើកនេះ យើងនឹងលេងដោយការដាក់សម្ពាធ គឺយើងត្រូវតែហ៊ានលេងជាមួយនឹងការប៉ះទង្គិច ព្រោះយើងត្រូវការគ្រាប់បាល់»។
ចំណែកក្រុមម្ចាស់ផ្ទះ ខេត្តត្បូងឃ្មុំ ក៏ហាក់មិនទាន់មានការជឿជាក់ខ្លាំង ក្នុងការបន្តយកឈ្នះលើខេត្តកំពង់ស្ពឺ ដូចគ្នា ព្រោះកីឡដ្ឋានវិទ្យាល័យប៊ុនរ៉ានីហ៊ុនសែនមេមត់ វាមិនមែនជាទីលានដែលពួកគេហ្វឹកហាត់នោះទេ ហើយកីឡដ្ឋាននេះ ក៏នៅឆ្ងាយពីកន្លែង ដែលពួកគេរស់នៅផងដែរ។
លោក ផន រស្មីពេជ្រ គ្រូបង្គោលក្រុមខេត្តត្បូងឃ្មុំ បាននិយាយថា៖«ទោះការប្រកួតលើកនេះ ធ្វើនៅលើទឹកដីយើង ប៉ុន្តែយើងមិនគិតថា ស្រួលជាងជើងទី១ប៉ុន្មានទេ ព្រោះកីឡាករភាគច្រើន នៅឆ្ងាយពីទីលាន ដ្បិតអីពួកយើងភាគច្រើន នៅសួង, តំបែរ និងក្រុងត្បូងឃ្មុំ អ៊ីចឹងទម្រាំទៅដល់តារាងមេមត់ យើងត្រូវជិះដល់ខ្ទង់៨០គីឡូម៉ែត្រឯណោះ ហេតុនេះយើងអាចមានបញ្ហាខ្លះដែរ ក្នុងការសម្របលើទីលាន ហើយយើងក៏មានកីឡាករម្នាក់ជាប់ពិន័យថែមទៀត»។
ជាមួយគ្នានេះ ក្រុមខេត្តកំពង់ឆ្នាំង នឹងបើកកីឡដ្ឋានវិទ្យាល័យកំពង់ត្រឡាច ដើម្បីស្វាគមន៍ក្រុមខេត្តកែប នៅរសៀលម៉ោង៣ ថ្ងៃពុធនេះដែរ។ ការប្រកួតនេះ អាចនឹងមានភាពស្វិតស្វាញខ្លាំង ព្រោះក្រុមម្ចាស់ផ្ទះ ត្រូវការរកគ្រាប់បាល់ ដើម្បីវាយបកទៅលើក្រុមខេត្តកែបវិញ ដ្បិតអីកាលប្រកួតជើងទី១ កន្លងមកនេះ ខេត្តកំពង់ឆ្នាំង បានចាញ់ក្រុមម្ចាស់ផ្ទះ ខេត្តកែប ៤-៣៕
