ការប្រកួតថ្នាក់ខេត្តនៃពានរង្វាន់សម្តេច ហ៊ុន សែន លើកទី១៤ ឆ្នាំ២០២០ បានរកឃើញក្រុមខ្លាំងទាំង៤ សម្រាប់ឡើងទៅប្រកួតថ្នាក់ជាតិ វគ្គ១៦ក្រុម ជាមួយក្រុម ដែលកំពុងលេងនៅលីកកំពូលកម្ពុជា ឆ្នាំ២០២០ ជាផ្លូវការហើយ បើទោះបីជា ក្រុមទាំង៤នេះ មិនទាន់ប្រកួតវគ្គពាក់កណ្តាលផ្តាច់ព្រ័ត្រ និងវគ្គផ្តាច់ថ្នាក់ខេត្ត ក៏ដោយ។
ក្រុមខេត្តសៀមរាប ខេត្តត្បូងឃ្មុំ ខេត្តកែប និងក្រុមខេត្តត្បូងឃ្មុំ គឺជាបេក្ខភាព ដែលបានឈ្នះកៅនៅវគ្គពាក់កណ្តាលផ្តាច់ព្រ័ត្រថ្នាក់ខេត្ត ហើយក៏ជាក្រុមដែលនឹងត្រូវឡើងទៅលេងថ្នាក់ជាតិ ជាមួយក្រុមលីកំពូលកម្ពុជាផងដែរ ព្រោះលក្ខខណ្ឌនៅក្នុងការប្រកួតពានរង្វាន់សម្តេចហ៊ុនសែន ឆ្នាំ២០២០នេះ បានកំណត់យកក្រុមចំនួន៤ ចេញពីការប្រកួតថ្នាក់ខេត្ត ឲ្យឡើងទៅលេងថ្នាក់ជាតិ។
ការសម្រេចបែបនេះ ក៏ព្រោះតែការប្រកួតលីកកំពូល នៅឆ្នាំនេះ មានតែ១៣ក្រុម ស្របពេលក្រុមយុវជនសាលាបាល់ទាត់ជាតិបាទីអាយុក្រោម១៨ឆ្នាំ មិនចូលរួមការប្រកួតថ្នាក់ជាតិនេះទៅទៀត។ អ៊ីចឹងមានន័យថា ក្រុមខេត្តព្រៃវែង ខេត្តសៀមរាប ខេត្តត្បូងឃ្មុំ និងក្រុមខេត្តកែប សុទ្ធតែបានឡើងទៅប្រកួតថ្នាក់ជាតិ ជាមួយក្រុមភ្នំពេញក្រោន ព្រះខ័នរាជស្វាយរៀង ណាហ្គាវើល វិសាខា អង្គរងាយហ្គឺរ បឹងកេត Tiffy Army សូលទីឡូអង្គរ នគរបាលជាតិ គិរីវង់សុខសែនជ័យ អាស៊ីអឺរ៉ុបយូណាយធីត និងអគ្គិសនីកម្ពុជា ដែលជាសុទ្ធតែជាក្រុមកំពុងលេងនៅលីកកំពូលកម្ពុជា ឆ្នាំ២០២០នេះ។
យ៉ាងណាក៏ដោយ ក្រុមខេត្តសៀមរាប ខេត្តត្បូងឃ្មុំ ខេត្តកែប និងក្រុមខេត្តត្បូងឃ្មុំ នឹងត្រូវប្រកួតគ្នា ដើម្បីរកក្រុមម្ចាស់ជើងឯកថ្នាក់ខេត្តសិន ដោយក្នុងនោះក្រុមខេត្តព្រៃវែង និងក្រុមខេត្តសៀមរាប ត្រូវជួបគ្នា នៅវគ្គផ្តាច់ព្រ័ត្រ ខណៈក្រុមខេត្តត្បូងឃ្មុំ ត្រូវប៉ះក្រុមខេត្តកែប ហើយវគ្គ១/២ផ្តាច់ព្រ័ត្រនេះ នឹងត្រូវធ្វើឡើង២ជើង ដោយក្នុងនោះជើងទី១ គ្រោងឈ្នះនៅថ្ងៃទី១៥ ឯជើងទី២ គ្រោងធ្វើនៅថ្ងៃទី២២ ខែកក្កដា ដើម្បីរកក្រុមឈ្នះ ឡើងទៅជួបគ្នាវគ្គផ្តាច់ព្រ័ត្រ។
គួរបញ្ជាក់ដែរថា ការឈ្នះកៅអី ឡើងទៅវគ្គពាក់កណ្តាលផ្តាច់ព្រ័ត្ររវាងក្រុមទាំង៤នេះ គឺបន្ទាប់ពីពួគេបានទម្លាក់ក្រុមខេត្តកោះកុង ខេត្តកណ្តាល ខេត្តកំពង់ស្ពឺ និងខេត្តកំពង់ឆ្នាំង នៅវគ្គជម្រុះ៨ក្រុមចុងក្រោយ ដោយក្នុងនោះ ក្រុមខេត្តព្រៃវែង បានឈ្នះក្រុមខេត្តកោះកុង ទាំង២ជើង ៥-១ និង ៣-០ ឯក្រុមខេត្តសៀមរាប បានទម្លាក់ក្រុមខេត្តកណ្តាល ដោយការទាត់បាល់ប៉េណាល់ទីកាត់សេចក្តី ៣-១ ព្រោះការប្រកួតទាំង២ជើងក្រុមទាំង២នេះ មានគ្រាប់បាល់ស្មើគ្នា ៤-៤។
ចំណែកការប្រកួតកាត់សេចក្តីជើងទី២ វគ្គ៨ក្រុមចុងក្រោយ កាលពីថ្ងៃពុធ ម្សិលមិញ ក្រុមខ្សែបម្រើ ជឿន ណាចារ រកបាន២គ្រាប់តែម្នាក់ នៅនាទីទី១២ និងទី៨៦ គឺនៅចន្លោះការរកបាន១គ្រាប់របស់ខ្សែប្រយុទ្ធពាក់លេខ៣៣ សា ម៉ូស្លីម នៅនាទី២១ ហើយ២គ្រាប់របស់គេ បានជួយឲ្យខេត្តកែប បន្តឈ្នះខេត្តកំពង់ឆ្នាំង ២-១ នៅក្រៅទឹកទី បន្ថែមលើការឈ្នះ ៤-៣ កាលពីជើងទី២ នៅលើទឹកដីខ្លួនឯង។
ជាមួយគ្នានេះ ខ្សែប្រយុទ្ធពាក់លេខ៧២ វ៉ាហេត ហាំហ្វា បានរកគ្រាប់បាល់តាមស្មើ ១-១ ឲ្យក្រុមខេត្តត្បូងឃ្មុំ នៅនាទីទី៥៨ ដើម្បីលុបចោលគ្រាប់បាល់នាំមុខរបស់ខេត្តកំពង់ស្ពឺ ដែលស៊ុតពីចម្ងាយដោយខ្សែប្រយុទ្ធពាក់លេខ៩ ណូ ស៊ូរី នៅនាទីទី៣៤ ហើយការស្មើគ្នា ១-១ នេះ បានធ្វើឲ្យក្រុមម្ចាស់ផ្ទះ ខេត្តត្បូងឃ្មុំ បន្តមានប្រៀបលើក្រុមខេត្តកំពង់ស្ពឺ ព្រោះការប្រកួតជើងទី១ ពួគេបានឈ្នះក្រុមម្ចាស់ផ្ទះ ខេត្តកំពង់ស្ពឺ ២-០៕
