ខ្សែប្រយុទ្ធ Mohamed Salah បានជួយឲ្យក្រុម Liverpool ស្ថិតលើផ្លូវនៃការបង្កើតកំណត់ត្រាពិន្ទុថ្មីក្នុងក្របខ័ណ្ឌ Premier League ខណៈដែលក្រុមម្ចាស់ជើងឯកមួយនេះ បានទទួលជ័យជម្នះក្នុងលទ្ធផល ៣-១ នៅលើទឹកដីក្រុម Brighton ស្របពេលដែលក្រុម Manchester City បានស្តារមុខមាត់វិញតាមរយៈការលត់ក្រុម Newcastle ចាស់ដៃក្នុងលទ្ធផល ៥-០ កាលពីថ្ងៃពុធ។
ក្រុមរបស់លោក Klopp កំពុងតែសង្ឃឹមថា អាចបំបែកកំណត់ត្រានៃការរកបានច្រើនជាង១០០ពិន្ទុ ដែលត្រូវបានបង្កើតឡើងដោយក្រុម Man City ក្នុងឆ្នាំ២០១៨ ហើយពួកគេនៅតែស្ថិតលើផ្លូវឆ្ពោះទៅកាន់ការបំបែកកំណត់ត្រានោះ ក្រោយពីបានកត់ត្រាជ័យជម្នះនៅក្រៅដីជាលើកទី១ បើគិតចាប់តាំងពីខែកុម្ភៈ។ Liverpool មាន៩២ពន្ទុ និងត្រូវការត្រឹមតែ៩ពិន្ទុទៀតប៉ុណ្ណោះពីការប្រកួត៤លើកចុងក្រោយ ដោយពួកគេត្រូវប៉ះជាមួយនឹងក្រុម Burnley, Arsenal, Chelsea និង Newcastle ដើម្បីបង្កើតកំណត់ត្រាថ្មី។
នៅពេលដែលត្រូវបានចោទសួរអំពីការប្រជែងបំបែកកំណត់ត្រា លោក Klopp បានឲ្យដឹងថា៖ «វាមិនសំខាន់សម្រាប់ខ្ញុំឡើយ។ ខ្ញុំមិនចាប់អារម្មណ៍ទៅលើករណីនេះឡើយ ប៉ុន្តែ ខ្ញុំចង់ឈ្នះការប្រកួតកីឡាបាល់ទាត់»៕
ប្រភពព័ត៌មាន៖ Channel News Asia
