លោក Pep Guardiola បានបញ្ជាក់ថា ក្រុម Manchester City ស័ក្តិសមនឹងទទួលបានការសុំអភ័យទោស ក្រោយពីបានរួចផុតពីការជាប់ពិន័យព្យួរពីក្របខ័ណ្ឌអឺរ៉ុបយ៉ាងជោគជ័យ ប៉ុន្តែ លោកគ្រូបង្វឹក Jose Mourinho និងលោក Jurgen Klopp បានរិះគន់សេចក្តីសម្រេចរបស់តុលាការអាជ្ញាកណ្តាលសម្រាប់កីឡា (CAS)។
CAS កាលពីថ្ងៃចន្ទ បានសម្រេចលុបចោលពិន័យព្យួររយៈពេល២ឆ្នាំ ដែលត្រូវបានដាក់ កាលពីដើម ទៅលើក្លិបស្ថិតក្នុងក្របខ័ណ្ឌ Premier League មួយនេះ ពីសំណាក់អង្គភាពគ្រប់គ្រងកីឡាបាល់ទាត់ទ្វីបអឺរ៉ុប ហៅកាត់ថា UEFA ក្រោមការចោទប្រកាន់ថា បានប្រព្រឹត្តល្មើសនឹងច្បាប់ប្រកួតប្រជែងគ្នាផ្នែកហិរញ្ញវត្ថុដោយយុត្តិធម៌ (FFP) នៅចន្លោះឆ្នាំ២០១២ និង២០១៦។ លោក Guardiola មានអារម្មណ៍ថា ក្លិបនេះ បានបង្ហាញពីការមិនធ្វើខុសរបស់ខ្លួន ក្រោយពីការចោទប្រកាន់អស់រយៈពេលជាច្រើនឆ្នាំទាក់ទងនឹងភាពខ្លាំងផ្នែកហិរញ្ញវត្ថុរបស់ពួកគេ ហើយលោកបានបញ្ជាក់ថា វាដល់ពេលហើយសម្រាប់ក្លិបផ្សេងក្នុងការទទួលស្គាល់ពីទីតាំងរបស់ខ្លួន។
គ្រូបង្វឹករបស់ក្លិប Man City រូបនេះបានប្រាប់សន្និសីទសារព័ត៌មានមុនការប្រកួតមួយថា៖ «ខ្ញុំពិតជារីករាយក្រៃលែងចំពោះសេចក្តីសម្រេចនេះ។ វាបង្ហាញថា រាល់អ្វីដែលគេគ្រប់គ្នានាំគ្នានិយាយ អំពីក្លិបនេះ គឺជារឿងមិនពិត»។
លោកបានបន្ថែមទៀតថា៖ «យើងគួរតែទទួលបានការសុំអភ័យទោស។ ប្រសិនបើយើងបានធ្វើរឿងដែលខុស យើងនឹងទទួលស្គាល់ការសម្រេចចិត្តពីសំណាក់ UEFA និង CAS»៕
ប្រភពព័ត៌មាន៖ Channel News Asia