គ្រូបង្វឹកក្រុមខេត្តកែប បានអះអាងថា ក្រុមរបស់លោក អាចនឹងមានលទ្ធភាព ដណ្តើមបានជ័យជម្នះ លើក្រុមខេត្តត្បូងឃ្មុំ សម្រាប់ការប្រកួតគ្នា ក្នុងវគ្គពាក់កណ្តាលផ្តាច់ព្រ័ត្រនៃពានរង្វាន់សម្តេច ហ៊ុន សែន លើកទី១៤ (ថ្នាក់ខេត្ត) ឆ្នាំ២០២០ នៅរសៀលម៉ោង៣ ថ្ងៃពុធនេះ។
បើទោះបីជា ការប្រកួតជើងទី១ ក្នុងពាក់កណ្តាលផ្តាច់ព្រ័ត្រនេះ ត្រូវធ្វើនៅកីឡដ្ឋានវិទ្យាល័យប៊ុនរ៉ានីហ៊ុនសែនមេមត់ ដែលជាទឹកដីរបស់ក្រុមខេត្តត្បូងឃ្មុំ ប៉ុន្តែ លោក ស សុរ៉ា បានចាត់ទុកការប្រកួតក្រៅទឹកដីមុនបែបនេះថា វានឹងធ្វើឲ្យក្រុមរបស់លោកមានភាពងាយស្រួលលេង ជាងការប្រកួតក្នុងទឹកដីខ្លួនឯងមុន។
គ្រូបង្វឹកក្រុមខេត្តកែប លោក ស សុរ៉ា បានប្រាប់កាលពីថ្ងៃអង្គារថា៖«ការទៅលេងនៅលើទឹកដីគេមុនបែបនេះ ខ្ញុំគិតថា វាស្រួលលេង និងស្រួលរៀបចំ ជាងការប្រកួតនៅលើទឹកដីរបស់យើងមុន។ ជាក់ស្តែងការប្រកួតវគ្គជម្រុះ៨ក្រុមចុងក្រោយជាមួយក្រុមខេត្តកំពង់ឆ្នាំង កន្លងមកនេះ យើងធ្វើម្ចាស់ផ្ទះមុន ដល់អ៊ីចឹងការប្រកួត ខ្ញុំមើលឃើញថា ដូចជាពិបាកលេង និងពិបាកក្នុងការរៀបចំ»។
គួររំឭកថា សម្រាប់ការប្រកួតជម្រុះវគ្គ៨ក្រុមចុងក្រោយ កន្លងមកនេះ ក្រុមខេត្តកែប បានយកឈ្នះក្រុមខេត្តកំពង់ឆ្នាំង ៤-៣ សម្រាប់ការប្រកួត នៅលើទឹកដីខ្លួនឯង ក្នុងជើងទី១ និងបានបន្តឈ្នះទាំងលំបាក ២-១ នៅក្រៅទឹកទី ក្នុងជើងទី២ ហើយគ្រាប់បាល់ទាំង២នោះ រកបានដោយក្រុមខ្សែបម្រើ ជឿន ណាចារ នៅនាទីទី១២ និងទី៨៦ គឺនៅចន្លោះការរកបាន១គ្រាប់របស់ខ្សែប្រយុទ្ធពាក់លេខ៣៣ សា ម៉ូស្លីម របស់ក្រុមម្ចាស់ផ្ទះ ខេត្តកំពង់ឆ្នាំង នៅនាទី២១។
នៅពេលសួរដល់ទម្រង់លេងរបស់ក្រុមខេត្តត្បូងឃ្មុំ លោក ស សុរ៉ា បានបញ្ជាក់ថា៖«ខ្ញុំអត់សូវបារម្ភទៅលើទម្រង់លេងរបស់ក្រុមខេត្តត្បូងឃ្មុំ ប៉ុន្មានទេ ព្រោះខ្ញុំបានមើល និងបានដឹងពីទម្រង់លេងរបស់ក្រុមមួយនេះរួចហើយ។ បន្ថែមលើនេះ កីឡាករជម្រើសដំបូងរបស់ខេត្តត្បូងឃ្មុំ ២នាក់ ក៏ជាប់ពិន័យកាតក្រហម មិនបានចូលលេងក្នុងជំនួបនេះផងដែរ ខណៈក្រុមរបស់យើងត្រៀមប្រយុទ្ធបានល្អ នឹងមានសង្ឃឹមឈ្នះដល់៨០ភាគរយ»។
យ៉ាងណាក៏ដោយ នេះគ្រាន់តែការអះអាង និងការបង្ហាញពីទំនុកចិត្តរបស់លោក ស សុរ៉ា ប៉ុណ្ណោះ ប៉ុន្តែលទ្ធផលប្រកួតជាក់ស្តែង ទៅជាយ៉ាងណានោះ នៅមិនទាន់ដឹងនៅឡើយទេ ខណៈអ្នកទស្សនាមួយចំនួន គិតថា ក្រុមម្ចាស់ជើងឯកឆ្នាំចាស់ ខេត្តត្បូងឃ្មុំ អាចនឹងមានឡើងភាព ឡើងដល់វគ្គផ្តាច់ព្រ័ត្រ។ ចំណែកការប្រកួតវគ្គ៨ក្រុមចុងក្រោយ កន្លងមកនេះ ខេត្តត្បូងឃ្មុំ បានទម្លាក់ក្រុមខេត្តកំពង់ស្ពឺ ដោយការយកឈ្នះ ២-០ នៅក្រៅទឹកដី និងស្មើគ្នា ១-១ នៅក្នុងទឹកដីខ្លួនឯង៕
