ក្រុមខេត្តសៀមរាប បានទទួលស្គាល់ថា ពួកគេ អាចនឹងពិបាកទប់ទល់ជាមួយក្រុមខេត្តព្រៃវែង សម្រាប់ការប្រកួតជើងទី១ វគ្គពាក់កណ្តាលផ្តាច់ព្រ័ត្រពានរង្វាន់សម្តេច ហ៊ុន សែន លើកទី១៤ (ថ្នាក់ខេត្ត) ឆ្នាំ២០២០ នៅកីឡដ្ឋានខេត្តសៀមរាប នារសៀលម៉ោង៣ ថ្ងៃពុធនេះ។
អ្នកចាត់ការទូទៅក្រុមខេត្តសៀមរាប លោក ជួន សុខវ៉ាន់ឌី បានដឹងរួចទៅហើយថា ក្រុមដែលលេងតំណាងឲ្យខេត្តព្រៃវែង គឺជាក្រុមយុវជនរបស់ក្លិបវិសាខា ដែលមានការប្រមូលផ្តុំហ្វឹកហាត់ ទៅតាមក្បួនខ្នាតយ៉ាងត្រឹមត្រូវ គឺខុសពីសមាជិកក្រុមសៀមរាប ដែលសុទ្ធតែជាអ្នកមកលេងដោយការស្ម័គ្រចិត្ត។
លោក ជួន សុខវ៉ាន់ឌី បានប្រាប់កាលថា៖ «ជាធម្មតា ការប្រកួត យើងត្រូវតែមានសង្ឃឹម ប៉ុន្តែលទ្ធផលយ៉ាងណានោះ គឺវាអាស្រ័យទៅលើការប្រកួតជាក់ស្តែង លើទីលាន ហើយដឹងថា សមត្ថភាពលេងរបស់យើង ហាក់នៅក្រោមគេ ព្រោះក្រុមលេងតំណាងឲ្យខេត្តព្រៃវែង ជាក្រុមយុវជនរបស់វិសាខា ដែលគេមានការប្រមូលផ្តុំហ្វឹកហាត់ត្រឹមត្រូវ និងមានប្រាក់ខែស៊ី ចំណែកកីឡាកររបស់យើង សុទ្ធតែមកលេងដោយការស្ម័គ្រចិត្ត»។
លោកបានបន្ថែមថា៖«ទម្រង់លេងរបស់គេ អាចល្អជាងយើង ហើយក្រុមយុវជនវិសាខានេះ ក៏ធ្លាប់បានឈ្នះក្រុមយើង នៅក្នុងការប្រកួតពានរង្វាន់វិទ្យាល័យជ្រើសរើសជើងឯកថ្នាក់ជាតិ ឆ្នាំ២០១៩ នៅវគ្គ៨ក្រុមផងដែរ ដោយកាលនោះ ពួកគេលេងតំណាងឲ្យក្រុមវិទ្យាល័យឥន្ទ្រទេវី ហើយក្រុមយើងលេងតំណាងឲ្យវិទ្យាល័យ១០មករា»។
យ៉ាងណាក៏ដោយ លោក ជួន សុខវ៉ាន់ឌី បានអះអាងថា នឹងជំរុញឲ្យក្រុមរបស់លោកលេងឲ្យអស់ពីសមត្ថភាព។ លោកបានបញ្ជាក់ថា៖«បើទោះបីជាការប្រកួតនេះ វាមានការពិបាកចំពោះពួកយើង ប៉ុន្តែយើងនឹងខំប្រឹងប្រែងលេងឲ្យអស់ពីសមត្ថភាព គឺយើងត្រូវលេងឲ្យអស់ពីលទ្ធភាព ដើម្បីឲ្យយើងអស់ចិត្ត ទៅនឹងលទ្ធផល ដែលយើងនឹងទទួលបាន ក្នុងការប្រកួតនេះ»។
ចំណែកលោក វី លីកា គ្រូបង្វឹកក្រុមយុវជនរបស់ក្លិបវិសាខា ហើយជាក្រុមលេងតំណាងឲ្យខេត្តព្រៃវែង នោះ ហាក់គេចវេះ ទៅនឹងការសួរនាំរបស់អ្នកសារព័ត៌មាន ព្រោះនៅពេលសួរពីការត្រៀមខ្លួនរបស់ក្រុមខេត្តព្រៃវែង បែរជាលោកឆ្លើយតបមកវិញថា ជាប់រវល់ ហើយក៏បិទទូរស័ព្ទ។
យ៉ាងណាក៏ដោយ តាំងពីការប្រកួតជម្រុះតាមពូល រហូតដល់ពេលនេះ ក្រុមខេត្តព្រៃវែង ធ្វើបានយ៉ាងល្អ មិនធ្លាប់ចាញ់នោះទេ ហើយវគ្គជម្រុះ៨ក្រុមចុងក្រោយ កន្លងមកនេះ ពួកគេ បានយកឈ្នះក្រុមខេត្តកោះកុង ៥-១ និង ៣-០ ចំណែកក្រុមខេត្តសៀមរាប បានទម្លាក់ក្រុមខេត្តកណ្តាល ដោយការទាត់បាល់ប៉េណាល់ទីកាត់សេចក្តី ៣-១ ព្រោះការប្រកួតទាំង២ជើងរបស់ក្រុមទាំង២នេះ មានគ្រាប់បាល់ស្មើគ្នា ៤-៤៕
