អង់គ្លេស៖ ខ្សែការពារ Virgil van Dijk បានលើកដៃទទួលស្គាល់ពីការប្រព្រឹត្តកំហុសរបស់ខ្លួន ដែលបានធ្វើឲ្យក្រុម Liverpool បាត់បង់ឱកាសក្នុងការបង្កើតកំណត់ត្រាថ្មីក្នុងក្របខ័ណ្ឌ Premier League ខណៈដែលក្រុម Arsenal បានវាយបកតាមពីក្រោយ ដើម្បីផ្តួលក្រុមម្ចាស់ជើងឯកមួយនេះ ក្នុងលទ្ធផល ២-១។
ការរងបរាជ័យជាលើកទី៣ក្នុងក្របខ័ណ្ឌលីកនៅរដូវកាលនេះសម្រាប់ក្រុមរបស់លោក Jurgen Klopp មានន័យថា ក្រុមហង្សក្រហមមួយនេះ មិនអាចបំបែកកំណត់ត្រានៃរកបាន១០០ពិន្ទុរបស់ក្រុម Manchester City កាលពី២រដូវកាលមុនឡើយ។ ខ្សែប្រយុទ្ធ Sadio Mane បានជួយឲ្យក្រុម Liverpool រកបានគ្រាប់បាល់នាំមុខមុន ខណៈដែលក្រុមភ្ញៀវ បានគ្រប់គ្រងការប្រកួតទាំងស្រុងក្នុងរយៈពេល៣០នាទីដំបូង នៅកីឡដ្ឋាន Emirates។
ប៉ុន្តែ ការបញ្ជូនបាល់មិនបានល្អរបស់ Van Dijk បានអនុញ្ញាតឲ្យខ្សែប្រយុទ្ធ Alexandre Lacazette រកបានគ្រាប់បាល់តាមស្មើវិញ នៅមុនពេលអ្នកចាំទី Alisson Becker បានប្រព្រឹត្តកំហុសដ៏កម្រមួយផ្សេងទៀត ដើម្បីអនុញ្ញាតឲ្យ Lacazette បញ្ជូនបាល់ទៅឲ្យ Reiss Nelson ដើម្បីរកបានគ្រាប់បាល់ឈ្នះនៅជិតបញ្ចប់តង់ទី១។ Van Dijk បានឲ្យដឹងថា៖ «គ្រាប់បាល់ដែលយើងផ្តល់ឲ្យពួកគេគឺជាកាដូមួយ។ ប្រសិនបើអ្នកផ្តល់គ្រាប់បាល់ដូចដែលយើងបានធ្វើនៅថ្ងៃនេះ ក្នុងនោះរាប់បញ្ចូលទាំងខ្លួនខ្ញុំដែរ អ្នកទទួលបានអ្វីដែលអ្នកស័ក្តិនឹងទទួលបាន»៕
ប្រភពព័ត៌មាន៖ Channel News Asia
