ក្រុមខេត្តកែប មិនអាចដណ្តើមបានជ័យជម្នះលើក្រុមម្ចាស់ផ្ទះខេត្តត្បូងឃ្មុំ ទៅតាមអ្វីដែលពួកគេបានរំពឹងនោះទេ សម្រាប់ការប្រកួតជើងទី១ វគ្គពាក់កណ្តាលផ្តាច់ព្រ័ត្រពានរង្វាន់សម្តេច ហ៊ុន សែន លើកទី១៤ (ថ្នាក់ខេត្ត) ឆ្នាំ២០២០ កាលពីថ្ងៃពុធ ម្សិលមិញ ចំណែកក្រុមខេត្តសៀម ពិតជាបានជួបការបរាជ័យ ក្រោមស្នាដៃក្រុមខេត្តព្រៃវែង ដូចអ្វីដែលពួកគេបានបារម្ភមែន។
នៅមុនការប្រកួតចាប់ផ្តើម លោក ស សុរ៉ា គ្រូបង្វឹកក្រុមខេត្តកែប បានបង្ហាញការជឿជាក់ថា ក្រុមរបស់លោក អាចមានក្តីសង្ឃឹមដល់៨០ភាគរយ ក្នុងការដណ្តើមបានជ័យជម្នះពីក្រុមម្ចាស់ផ្ទះ ខេត្តត្បូងឃ្មុំ ព្រោះលោកបានមើលឃើញថា ខេត្តត្បូងឃ្មុំ មិនមានទម្រង់លេងល្អប៉ុនា្មនទេ។
ប៉ុន្តែតាមរយៈការប្រកួតជាក់ស្តែង នៅកីឡដ្ឋានវិទ្យាល័យប៊ុនរ៉ានីហ៊ុនសែនមេមត់ កាលពីម្សិលមិញនោះ អតីតក្រុមម្ចាស់ជើងឯកថ្នាក់ខេត្តឆ្នាំ២០១៩ ខេត្តត្បូងឃ្មុំ បានរកគ្រាប់នាំមុខ ២-០ ដោយប្រើពេលត្រឹម២៨នាទី ដោយក្នុងនោះកីឡាករពាក់លេខ៧២ វ៉ាហេត ហាំហ្វា រកបានគ្រាប់បាល់បើកឆាក នៅនាទី១៣ ហើយ យូ សុះហ្វា បានបន្ថែម១គ្រាប់ទៀត នៅនាទីទី២៨។
ជាមួយការនាំមុខនេះ ក្រុមខេត្តកែប បានព្យាយាមវាយបកវិញយ៉ាងខ្លាំង ហើយការធ្វើឲ្យកីឡាករ ជឿន ណាចារ ដួលនៅក្នុងតំបន់គ្រោះថ្នាក់ ពីដំណាក់ខ្សែការពារ សា អារី នាំឲ្យអាជ្ញាកណ្តាលផ្តល់បាល់ពិន័យ១១ម៉ែត្រទៅឲ្យក្រុមខេត្តកែប ហើយប្រធានក្រុម សុខ ភារម្យ ជាអ្នកស៊ុតបានសម្រេច នៅនាទីទី៤៥។
យ៉ាងណាក៏ដោយ ការចាញ់ក្រុមខេត្តត្បូងឃ្មុំ ២-១ នៅក្រៅទឹកដីនេះ វានៅមិនទាន់ធ្វើឲ្យក្រុមខេត្តកែប អស់ក្តីរំពឹងនៅឡើយទេ ព្រោះពួកគេ នៅសល់រយៈពេល៩០នាទីទៀត ដើម្បីវាយបកទៅលើក្រុមខេត្តត្បូងឃ្មុំ គឺការប្រកួតជើងទី២ កាត់សេចក្តី ដែលត្រូវធ្វើនៅលើទឹកដីក្រុមខេត្តកែប វិញ។
ចំណែកក្រុមខេត្តសៀមរាប ពិតជាបានជួបរឿងមិនសប្បាយចិត្ត ដូចទៅនឹងអ្វីដែលអ្នកចាត់ការទូទៅក្រុម លោក ជួន សុខវ៉ាន់ឌី បានលើកឡើងមុនការប្រកួតមែន ព្រោះលោកបានមើលឃើញថា ក្រុមរបស់លោក មានទម្រង់លេងនៅក្រោមក្រុមយុវជនវិសាខា ដែលលេងតំណាងឲ្យខេត្តព្រៃវែង។
តាមរយៈការប្រកួតនៅកីឡដ្ឋានខេត្តសៀមរាប កាលពីថ្ងៃពុធនោះ ក្រុមខេត្តសៀមរាប បានព្យាយាមលេងទប់បានយ៉ាងល្អ ដើម្បីធ្វើឲ្យការប្រកួតតង់ទី១ បានបញ្ចប់ទៅដោយគ្មានលទ្ធផល ០-០ ប៉ុន្តែឈានចូលតង់ទី២ ខ្សែប្រយុទ្ធ គី រីណា និង វុធ តុលា បានស៊ុតទម្លុះសំណាញ់ទីបានម្នាក់១គ្រាប់ នៅនាទីទី៧២ និងទី៧៦ ដើម្បីជួយឲ្យក្រុមខេត្តព្រៃវែង ឈ្នះ ២-០ យ៉ាងរំភើប ហើយជ័យជម្នះនេះ វានឹងធ្វើឲ្យពួកគេ កាន់តែមានកម្លាំងចិត្ត ក្នុងការត្រៀមខ្លួនស្វាគមន៍ ក្រុមខេត្តសៀមរាប សម្រាប់ការប្រកួតជើងទី២ នៅលើទឹកដីរបស់ពួកគេវិញ៕
