ស្របពេលដែលក្រុមខ្លាំង កំពុងឈរនៅកំពូលតារាងនៃលីកកំពូលកម្ពុជា គឺ ព្រះខ័នរាជស្វាយរៀង ដល់វេនត្រូវឈប់សម្រាកបំប៉នកម្លាំង នៅសប្តាហ៍នេះ ក្រុមលេខ២ ភ្នំពេញក្រោន ព្រមទាំងក្រុមវិសាខា និងណាហ្គាវើល សុទ្ធតែនឹងអាចជួបភាពសប្បាយរីករាយ ចំពោះការប្រកួតរបស់ពួកគេ នៅថ្ងៃសៅរ៍ និងថ្ងៃអាទិត្យនេះ ប៉ុន្តែ បឹងកេត និង អង្គរថាយហ្គឺរ អាចនឹងប្រឈមការលំបាកច្រើន។
ក្រុមភ្នំពេញក្រោន ដែលទើបស្មើ ១-១ ជាមួយក្រុមណាហ្គាវើល កាលពីសប្តាហ៍មុន ត្រូវបានគេមើលឃើញថា នឹងអាចរកបាន៣ពិន្ទុបន្ថែម សម្រាប់ការប្រកួតលើកនេះ ដើម្បីពង្រឹងទីតាំងលេខ២របស់ខ្លួន ព្រោះពួកគេ ត្រូវជួបជាមួយក្រុមឈរនៅបាតតារាង នគរបាលជាតិ។
បើទោះបីជា ក្រុមនគរបាលជាតិ នៅពេលនេះ ដឹកនាំដោយគ្រូបង្វឹកជើងចាស់ ធ្លាប់មានស្នាដៃ ប្រាក់ សុវណ្ណារ៉ា ប៉ុន្តែ៦ប្រកួតកន្លងមកនេះ នគរបាលជាតិ បានចាញ់ទាំង៦លើក នឹងកំពុងឈរនៅបាតតារាង។ ជាមួយគ្នានេះ លោក ស៊ុំ វណ្ណា គ្រូបង្វឹកក្រុមភ្នំពេញក្រោន បានលោកឡើងថា លោកនឹងកែប្រែចំណុចខ្វះខាត ពេលស្មើជាមួយណាហ្គាវើល ជាពិសេសតំបន់ប្រយុទ្ធ ដើម្បីយកឈ្នះក្រុមនគរបាលជាតិ លើកនេះ។
ស្រដៀងគ្នានេះ ក្រុមវិសាខា ដែលឈរនៅលេខ៤ ក៏អាចនឹងដណ្តើមបាន៣ពិន្ទុផងដែរ ព្រោះលើកនេះ ពួកគេត្រូវជួបក្រុមខ្ចីបទពិសោធ យុវជនបាល់ទាត់ជាតិបាទី ដែលអាចនឹងយកឈ្នះបាន ចំណែកណាហ្គាវើល ដែលកំពុងឈរនៅលេខ៦ ក៏នឹងអាចដណ្តើមបាន៣ពិន្ទុដូចគ្នា ដ្បិតអីពួកគេ ត្រូវជួបក្រុមប្រើកីឡាករខ្មែរសុទ្ធ អគ្គិសនីកម្ពុជា ដែលទើបឈ្នះ១ប្រកួតទេ។
ផ្ទុយពីនេះ ក្រុមបឹងកេត ដែលកំពុងឈរនៅលេខ៣ នឹងត្រូវប្រឈមការប្រកួតដ៏ស្វិតស្វាញមួយ ខណៈពួកគេ ត្រូវជួបក្រុមកងយោធពលខេមរភូមិន្ទ (ទ័ព) នោះ ព្រោះក្រុមទ័ព ក៏ត្រូវការឈ្នះ ដាច់ខាត ដើម្បីបានឡើងមកឈរនៅតំបន់ Top6 ដែលអាចមានសិទ្ធប្រកួតដណ្តើមជើងឯក នៅជើងទី២ ផងដែរ។ រីឯ ក្រុមឈរនៅលេខ៥ អង្គរថាយហ្គឺរ ក៏ហាក់មិនទាន់ប្រាកដ ក្នុងការដណ្តើម៣ពិន្ទុ ពីក្រុមម្ចាស់ផ្ទះអាស៊ីអឺរ៉ុប ដូចគ្នា ព្រោះសុទ្ធតែជាការប្រកួតតានតឹង៕
