អង់គ្លេស៖ ក្រុម Chelsea បានឈ្នះកៅអីទៅវគ្គផ្តាច់ព្រ័ត្រនៃពាន FA Cup ខណៈដែលអ្នកចាំទី David De Gea របស់ក្លិប Manchester United បានប្រព្រឹត្តកំហុសជាបន្តបន្ទាប់ ក្នុងពេលក្រុមតោខៀវ បានទទួលជ័យជម្នះក្នុងលទ្ធផល ២-១ កាលពីថ្ងៃអាទិត្យ។
ក្រុមរបស់លោក Frank Lampard នឹងត្រូវឈានទៅជួបក្រុមស្ថិតក្នុងទីក្រុងតែមួយ Arsenal ក្នុងវគ្គផ្តាច់ព្រ័ត្រ នៅថ្ងៃទី១ ខែសីហា ក្រោយពីការបង្ហាញពីទម្រង់លេងខកចិត្តមួយពីសំណាក់ De Gea។ កីឡាករសញ្ជាតិអេស្ប៉ាញរូបនេះ បានធ្វើឲ្យមានកំហុស នៅពេលដែលរូបគេបានអនុញ្ញាតឲ្យខ្សែប្រយុទ្ធ Olivier Giroud ស៊ុតបាល់បំប៉ោងសំណាញ់ទី នៅតង់ទី១ នាកីឡដ្ឋាន Wembley។ បន្ទាប់មក De Gea បានធ្វើឲ្យមានកំហុសបន្ថែមទៀត ក្រោយពីសម្រាកតង់ទី១ នៅពេលដែលរូបគេបានអនុញ្ញាតឲ្យ Mason Mount ស៊ុតបាល់បន្ថែមបញ្ចូលទី ក្រោយពីការសង្គ្រោះបាល់ដោយគ្មានកម្លាំងរបស់គេ។
បើទោះបីជាការចាប់អារម្មណ៍ផ្សេងៗបានធ្លាក់ទៅលើ De Gea និងអនាគតរបស់គេ នៅក្នុងក្លិបនេះ ក្រោយពីការប្រព្រឹត្តកំហុសរបស់គេនាពេលថ្មីៗនេះ ក៏ដោយ ប៉ុន្តែ Chelsea ពិតជាលេងបានល្អប្រសើរជាង ខណៈដែលពួកគេបានឈានទៅវគ្គផ្តាច់ព្រ័ត្រនៃ FA Cup ជាលើកទី១ បើគិតចាប់តាំងពីពួកគេបានឈ្នះពាននេះ ក្នុងឆ្នាំ២០១៨។ ការធ្វើឲ្យបាល់ចូលទីខ្លួនឯងរបស់អ្នកចាំទី Harry Maguire បានបំពេញរាត្រីដ៏ខកចិត្តមួយសម្រាប់ក្រុម Man United ដែលបានរងបរាជ័យជាលើកទី១ ក្នុងចំណោមការប្រកួត២០លើក ក្នុងរាល់យុទ្ធនាការទាំងអស់ បើទោះបី Bruno Fernandes បានវាយបក១គ្រាប់វិញនៅជិតបញ្ចប់ការប្រកួតក៏ដោយ៕
ប្រភពព័ត៌មាន៖ Channel News Asia
