អ៊ីតាលី៖ ខ្សែប្រយុទ្ធ Cristiano Ronaldo បានជួយឲ្យក្រុម Juventus ស្ថិតលើផ្លូវឆ្ពោះទៅកាន់ការឈ្នះពានក្របខ័ណ្ឌ Serie A ជាលើកទី៩ជាប់ៗគ្នារបស់ពួកគេ កាលពីថ្ងៃចន្ទ ក្រោយពីបានស៊ុតបាល់បញ្ចូលទី២គ្រាប់ ក្នុងពេលក្រុមខ្លួនទទួលជ័យជម្នះក្នុងលទ្ធផល ២-១ លើក្រុម Lazio។
ក្រុមម្ចាស់ការពារតំណែងជើងឯកមួយនេះ បានបញ្ចប់ការមិនស្គាល់ចាញ់សោះត្រឹម៣ប្រកួត ក្រោយពី Ronaldo បានស៊ុតបាល់បញ្ចូលទី២គ្រាប់នៅតង់ទី២ ដើម្បីជួយឲ្យពួកគេនាំមុខ៨ពិន្ទុដាច់លើក្រុមឈរលេខ២ Inter Milan ខណៈដែលនៅសល់ការប្រកួត៤លើកទៀត។ ក្រុមរបស់លោក Maurizio Sarri អាចឈ្នះពាននៅត្រឹមថ្ងៃចន្ទសប្តាហ៍ក្រោយ នៅពេលប្រកួតជាមួយនឹងក្រុម Udinese នៅថ្ងៃអាទិត្យ លើទឹកដីខ្លួនឯងពេលប៉ះជាមួយនឹងក្រុម Sampdoria ដោយផ្អែកទៅលើលទ្ធផលរបស់គូប្រកួតខ្លួននៅសប្តាហ៍នេះ។ ក្តីសង្ឃឹមរបស់ក្រុម Lazio ក្នុងការឈ្នះពានក្របខ័ណ្ឌ Serie A ជាលើកទី១ បើគិតចាប់តាំងពីឆ្នាំ២០០០ ស្ទើរតែបានបញ្ចប់ទៅហើយ ខណៈដែលការរងបរាជ័យ ធ្វើឲ្យឈរក្នុងចំណាត់ថ្នាក់លេខ៤ ដោយដេញតាមពីក្រោយក្រុមកំពុងតែនាំមុខដល់ទៅ១១ពិន្ទុ។ Ronaldo បានរកគ្រាប់បាល់ទី១របស់គេ ពីការស៊ុតបាល់ប៉េណាល់ទី ក្រោយពីចូលលេងក្នុងតង់ទី២ភ្លាមៗ និងបានរកគ្រាប់បាល់បញ្ចូលទី១គ្រាប់ទៀត ក្រោមជំនួយពីមិត្តរួមក្រុម Paulo Dybala។ តារាឆ្នើមអន្តរជាតិព័រទុយហ្គាល់រូបនេះ បានរកគ្រាប់បាល់ទី៣០របស់គេនៅរដូវកាលនេះ ដើម្បីតាមស្មើខ្សែប្រយុទ្ធ Ciro Immobile របស់ក្លិប Lazio ក្រោយពី Immobile បានបញ្ចប់ការមិនអាចរកបានគ្រាប់បាល់តាមរយៈការស៊ុតបាល់ប៉េណាល់ទី១គ្រាប់នៅជិតបញ្ចប់ការប្រកួត៕
ប្រភពព័ត៌មាន៖ Channel News Asia
