ប្រទេសអង់គ្លេស៖ ខ្សែប្រយុទ្ធ Timo Werner បានបញ្ជាក់ថា លោក Frank Lampard អ្នកចាត់ការទូទៅរបស់ក្លិប Chelsea គឺជាកត្តាលីករដ៏សំខាន់ នៅក្នុងជម្រើសរបស់គេ ដើម្បីចូលរួមជាមួយនឹងក្លិបតោខៀវមួយនេះ នៅរដូវកាលក្រោយ បើទោះបីមានការចាប់អារម្មណ៍ពីក្លិបធំៗជាច្រើននៅអឺរ៉ុបក៏ដោយ។
Werner វ័យ២៤ឆ្នាំ បានស៊ុតបាល់បញ្ចូលទី៣៤គ្រាប់ សម្រាប់ក្លិប RB Leipzig ក្នុងរដូវកាលឆ្នាំ២០១៩-២០២០ ប៉ុន្តែ នឹងមិនចូលរួមជាមួយនឹងក្រុមអាល្លឺម៉ង់មួយនេះ ក្នុងក្របខ័ណ្ឌ ChampionsLeague នៅខែក្រោយឡើយ ខណៈដែលរូបគេបានធ្វើដំណើរទៅដល់កីឡដ្ឋាន Stamford Bridge រួចជាស្រេច ដើម្បីត្រៀមសម្រាប់រដូវកាលក្រោយ។ តារាឆ្នើមអន្តរជាតិអាល្លឺម៉ង់រូបនេះ គឺជាគោលដៅរបស់ក្លិបធំៗជាច្រើន ខណៈដែល Liverpool បានទាក់ទងទិញអស់រយៈពេលជាច្រើនខែមកហើយ ក្រោយពី Wernerបានបង្ហើបពីឈ្មោះរបស់លោក boss Jurgen Klopp គ្រូបង្វឹករបស់ Liverpool។ ប៉ុន្តែ ទោះបីជាយ៉ាងណា រូបគេបានបញ្ជាក់ថា ទស្សនរបស់លោក Lampard ទៅលើរបៀបដែលរូបគេស័ក្តិសមនឹងតំបន់ប្រយុទ្ធថ្មីនារដូវកាលក្រោយ ដោយកីឡាករ Hakim Ziyech ត្រូវបានទិញចូលរួចជាស្រេចពីក្លិប Ajax ធ្វើឲ្យរូបគេជឿជាក់ក្នុងការចូលរួមជាមួយនឹងក្លិប Chelsea ក្នុងតម្លៃខ្លួន៥៤លានផោន (ស្មើនឹង៧០លានដុល្លារអាមេរិក។ ទាក់ទងនឹងឥទ្ធិពលរបស់លោក Lampard ខ្សែប្រយុទ្ធ Werner បានប្រាប់គេហទំព័រ Chelsea ថា៖ «គាត់គឺជាកតត្តាលីករដ៏ចម្បង។ យើងបានជជែកគ្នាជាច្រើនពីចំណុចនានា ដូចជាប្រព័ន្ធលេង របៀបដែលគាត់ចង់លេង និងរង់ចាំមើលខ្ញុំលេង ហើយរបៀបដែលប្រព័ន្ធស័ក្តិសមនឹងរូបខ្ញុំ»៕
ប្រភពព័ត៌មាន៖ Channel News Asia
