បរទេស៖ ក្លិប RB Leipzig បានប្រកាសកាលពីថ្ងៃអង្គារថា ពួកគេបានបំពេញការនាយកអតីតតារាឆ្នើមរបស់ខ្លួន Timo Werner ពីក្លិប Chelsea វិញ ក្នុងកិច្ចសន្យារយៈពេល៤ឆ្នាំ។ ខ្សែប្រយុទ្ធអន្តរជាតិអាល្លឺម៉ង់ Werner វ័យ២៦ឆ្នាំ បានចំណាយពេល២រដូវកាលនៅក្លិបអង់គ្លេស ដោយបានស៊ុតបាល់បញ្ចូលទី១០គ្រាប់ ក្នុងការបង្ហាញខ្លួន៥០លើកក្នុងក្របខ័ណ្ឌ Premier League។
បើយោងទៅតាមព័ត៌មាននានា ក្លិបស្ថិតក្នុងក្របខ័ណ្ឌ Bundesliga មួយនេះ បានចំណាយប្រាក់ចំនួន២៥លានផោន (ស្មើនឹង៣០,២លានដុល្លារអាមេរិក) ដើម្បីនាំយកខ្សែប្រយុទ្ធដ៏ឆ្នើមរបស់ពួកគេត្រឡប់មកវិញ។ Werner បានឲ្យដឹងក្នុងសេចក្តីថ្លែងការណ៍មួយរបស់ Leipzig ថា៖ «ខ្ញុំពិតជារីករាយណាស់ក្នុងការអាចលេងឲ្យក្លិប RB Leipzig ម្តងទៀត។
ខ្ញុំបានជួបពេលវេលាដ៏អស្ចារ្យនៅទីនេះ នៅចន្លោះឆ្នាំ២០១៦ និងឆ្នាំ២០២០ ដែលនៅពេលនោះយើងបានបង្ហាញពីទម្រង់លេងដ៏អស្ចារ្យ ក្នុងនាមជាក្លិបចំណូលថ្មីក្នុងលីគនេះ»។ កាលពីព្រឹកថ្ងៃអង្គារ ខ្សែប្រយុទ្ធអន្តរជាតិអាល្លឺម៉ង់រូបនេះ បានប្រកាសពីការចាកចេញរបស់គេពីកីឡដ្ឋាន Stamford Bridge ដែលជាកន្លែងរូបគេបានឈ្នះពានក្របខ័ណ្ឌ Champions League ក្នុងឆ្នាំ២០២១ ប៉ុន្តែ បានជួបការលំបាកក្នុងការរកឲ្យឃើញទម្រង់លេងដ៏រឹងមាំរបស់គេ៕
ប្រភពព័ត៌មាន៖ Channel News Asia