បរទេស៖ ខ្សែប្រយុទ្ធចំណូលថ្មី Timo Werner មិនគួរត្រូវបានប្រៀបធៀបទៅនឹងអតីតខ្សែប្រយុទ្ធរបស់ក្លិប Chelsea គឺ Fernando Torres ឡើយ ហើយតារាឆ្នើមអន្តរជាតិអាល្លឺម៉ង់រូបនេះ ត្រូវតែទទួលនបាបរិស្ថានដ៏ល្អបំផុតដើម្បីបង្កើតផ្លែផ្កា នៅក្នុងក្លិបមានមូលដ្ឋាននៅទីក្រុងឡុងដ៍មួយនេះ។ នេះបើយោងទៅតាមការបញ្ជាក់របស់លោក Frank Lampard កាលពីថ្ងៃចន្ទ។
Werner ដែលបានចូលរួមជាមួយនឹងក្លិប Chelsea ពីក្លិប RB Leipzig របស់ក្របខ័ណ្ឌ Bundesliga នៅពេលបិទរដូវកាល ក្នុងតម្លៃខ្លួនប្រមាណជា៥០លានអឺរ៉ូ (ស្មើនឹង៦០,៣៤លានដុល្លារអាមេរិក) នោះ មិនបានរកគ្រាប់បាល់បញ្ចូលទីសោះក្នុងការបង្ហាញខ្លួនក្នុងក្រខ័ណ្ឌ Premier League ចំនួន១០លើកចុងក្រោយរបស់គេ។ Torres ក៏បានជួបភាពត្រដាបត្រដួសស្រដៀងគ្នានេះផងដែរ ក្រោយពីការផ្ទេររបស់គេពីក្លិប Liverpool ក្នុងឆ្នាំ២០១១ ហើយលោក Lampard បានបញ្ជាក់ថា លោកនឹងធ្វើការជាមួយនឹងខ្សែប្រយុទ្ធធ្លាក់ទម្រង់លេង Werner ដែលកំពុងតែព្យាយាមស្វែងរកជំនឿចិត្ត បន្ទាប់ពីការចាប់ផ្តើមយ៉ាងល្អនៅរដូវកាលនេះ។ នៅមុនពេលការប្រកួតជាមួយនឹងក្រុម Leicester City នៅរាត្រីនេះ លោក Lampard បានប្រាប់អ្នកយកព័ត៌មានថា៖ «ខ្ញុំនឹងមិនប្រៀបធៀបរូបគេទៅនឹងកីឡាករណាម្នាក់ឡើយ។ គ្រប់គ្នា គឺមានភាពផ្សេងគ្នា Torres បានជួបពេលវេលាដ៏លំបាកនៅទីនេះ ប៉ុន្តែ រូបគេបានឈ្នះពានក្របខ័ណ្ឌ Champions League»។
លោកបានបន្ថែមទៀតថា៖ «អ្វីដែលយើងត្រូវតែធ្វើ គឺការបង្កើតបរិស្ថានដ៏ល្អបំផុតដើម្បីទាញយកសមត្ថភាពដ៏ខ្លាំងបំផុតពី Timo។ អ្នកត្រូវតែធ្វើម្តងហើយម្តងទៀត បន្តការធ្វើការ ហើយរូបគេត្រូវតែបន្តអត់ធ្មត់ និងផ្តោតអារម្មណ៍។ ខ្ញុំត្រូវតែធ្វើឲ្យរូបគេមានអារម្មណ៍វិជ្ជមាន»៕
ប្រភពព័ត៌មាន៖ Channel News Asia
