គ្រូបង្វឹកក្រុមខេត្តត្បូងឃ្មុំ លោក ផន រស្មីពេជ្រ បានអះអាងថា ក្រុមរបស់លោក នឹងលេងដោយគ្មានសម្ពាធអ្វីទាំងអស់ សម្រាប់ការប្រកួតផ្តាច់ព្រ័ត្រថ្នាក់ខេត្ត ពានរង្វាន់សម្តេចហ៊ុនសែន លើកទី១៤ ឆ្នាំ២០២០ នៅពហុកីឡដ្ឋានជាតិ នាល្ងាចម៉ោង៦ ថ្ងៃពុធនេះ បើទោះបីជាជំនួបដ៏សំខាន់នេះ ពួកគេ ត្រូវវិលមកជួបក្រុមយុវជនក្លិបវិសាខា ដែលលេងតំណាងឲ្យខេត្តព្រៃវែង ក៏ដោយ។
បើទោះបីជា ក្រុមយុវជនក្លិបវិសាខា បានលត់ក្រុមខេត្តសៀមរាប យ៉ាងចាស់ដៃ ក្នុងការប្រកួតវគ្គពាក់កណ្តាលផ្តាច់ព្រ័ត្រ តាមរយៈការឈ្នះ ២-០ នៅក្រៅទឹកដី និងលត់ ៧-០ បន្ថែម នៅជើងទី២ ក្នុងការប្រកួតក្នុងទឹកដី ប៉ុន្តែ លោក ផន រស្មីពេជ្រ គ្រូបង្វឹកក្រុមត្បូងឃ្មុំ បានមើលឃើញថា យុវជនក្លិបវិសាខា មានសមត្ថភាពលេង មិនលើសខ្វះជាមួយក្រុមលោកប៉ុន្មានទេ។
លោក ផន រស្មីពេជ្រ បាននិយាយក្នុងសន្និសីទកាសែត កាលពីថ្ងៃអង្គារថា៖ «ក្រុមយើង បានត្រៀមខ្លួនរួចរាល់អស់ហើយ ហើយខ្ញុំគិតថា ការប្រកួតនេះ យើងអត់មានសម្ពាធអ្វីទេ ឆន្ទៈរបស់ពួកយើង គឺចង់ឈ្នះ ព្រោះមុននឹងមកទីនេះ យើងបានរៀបចំ និងប្រជុំបច្ចេកទេស ដោយមានការលើកទឹកចិត្តពីឯកឧត្តមអភិបាលខេត្តត្បូងឃ្មុំ ទៀតផង អ៊ីចឹងពួកខ្ញុំ នឹងប្រឹងលេងឲ្យឈ្នះ»។
លោក ផន រស្មីពេជ្រ បានបន្ថែមថា៖ «ស្ថានភាពកីឡាកររបស់ខ្ញុំ អត់ជាបញ្ហាចោទអ្វីទេ សុខភាពធម្មតា អត់មានកីឡាកររបួសទេ អ៊ីចឹងយើងអត់មានសម្ពាធក្នុងការប្រកួតនោះទេ។ ទោះក្រុមខេត្តព្រៃវែង ជាយុវជនរបស់ក្លិបវិសាខា តែពួកយើង ធ្លាប់ជួបពួកគាត់២លើកមកហើយ ហើយសមត្ថភាពមើលទៅមិនលើសខ្វះគ្នាប៉ុន្មានទេ គ្រាន់តែការប្រកួតនេះ អាចមានភាពតានតឹងខ្លាំង»។
ការមិនខ្លាចញញើត ចំពោះការប្រឈមមុខជាមួយក្រុមយុវជនក្លិបវិសាខា នៅក្នុងវគ្គផ្តាច់ព្រ័ត្រនេះ ក៏ព្រោះថា ការជួបគ្នា២លើក ក្នុងវគ្គជម្រុះតាមពូល កន្លងមកនេះ ខេត្តត្បូងឃ្មុំ និង ខេត្តព្រៃវែង បានបញ្ចប់ក្នុងលទ្ធផលស្មើគ្នាទាំង២ជើង គឺជើងទី១ ស្មើគ្នា ០-០ ក្នុងទឹកដីខេត្តត្បូងឃ្មុំ ហើយជើងទី២ ស្មើគ្នា ២-២ នៅទឹកដីខេត្តព្រៃវែង ខណៈការប្រកួតវគ្គពាក់កណ្តាលផ្តាច់ព្រ័ត្រ កន្លងមកនេះ ក្រុមខេត្តត្បូងឃ្មុំ បានទម្លាក់ក្រុមខេត្តកែប ជាមួយការឈ្នះ ២-១ និងបន្តឈ្នះ ៣-១ នៅជើងទី២។
ចំណែកគ្រូបង្វឹកក្រុមយុវជនវិសាខា លោក Matthew Sinclair បាននិយាយថា៖«វាជមោទនភាពសម្រាប់ក្រុមយុវជនរបស់យើង ដែលបានលេងតំណាងឲ្យខេត្តព្រៃវែង នៅក្នុងព្រឹត្តិការណ៍ដ៏សំខាន់នេះ ព្រោះយើងចង់បង្ហាញពីគុណភាពកីឡាករវ័យក្មេងរបស់យើងព គឺពួកគាត់ក្មេងមែន តែពួកគាត់អាចធ្វើបាន»។
លោក Matthew Sinclair បានបន្ថែមថា៖«ចំណែកការប្រកួតផ្តាច់ព្រ័ត្រនេះ វាជាជំនួបដ៏សំខាន់ និងជាឱកាសសម្រាប់ពួកគាត់ ត្រូវបង្ហាញសមត្ថភាពនៅលើទីលាន ប៉ុន្តែដោសារលើកនេះ យើងលេងនៅលើទីលានសិប្បនិម្មិត ដែលប្លែកពីការជួបគ្នា២លើកកន្លងមកនេះ អ៊ីចឹងវាអាចជាផលពិបាកមួយ សម្រាប់ខ្ញុំ ក៏ដូចជាកូនក្រុមរបស់យើងផងដែរ ហេតុនេះទើបយើងបានត្រៀមខ្លួន និងព្យាយាមរៀបចំ ដោយតាំងចិត្ត ខំប្រឹងធ្វើឲ្យបានល្អ»៕
