ក្រុមយុវជនក្លិបវិសាខា ដែលលេងតំណាងឲ្យខេត្តព្រៃវែង បានរកជ័យជម្នះដ៏ធំមួយ ចំពោះការខិតខំប្រឹងប្រែងរបស់ពួកគេ គឺការយកឈ្នះក្រុមខេត្តត្បូងឃ្មុំ ត្រឹម ១-០ នៅក្នុងការប្រកួតផ្តាច់ព្រ័ត្រ ដើម្បីលើកពាន ការប្រកួតថ្នាក់ខេត្តពានរង្វាន់សម្តេចហ៊ុនសែន ឆ្នាំ២០២០ កាលពីយប់មិញ ខណៈក្រុមខេត្តកែប បានទទួលចំណាត់ថ្នាក់លេខ៣ ក្រោយឈ្នះក្រុមខេត្តសៀមរាប ៣-០ កាលពីថ្ងៃពុធនោះដែរ។
សម្រាប់ការប្រកួត នៅពហុកីឡដ្ឋានជាតិ កាលពីថ្ងៃអាទិត្យនោះ ខ្សែប្រយុទ្ធ វុធ តុលា ជាអ្នករកបានគ្រាប់បាល់ជ័យជម្នះឲ្យក្រុមខេត្តព្រែវែង តាមរយៈការស៊ុតបាល់បញ្ចូលទីយ៉ាងល្អរបស់គេ នៅនាទីទី៤៨ ហើយគ្រាប់បាល់នេះ បានជួយឲ្យក្រុមខេត្តព្រៃវែង បង្កើតបាននូវកំណត់ត្រាថ្មី គឺការក្លាយជាម្ចាស់ជើងឯកថ្នាក់ខេត្ត ពានរង្វាន់សម្តេច ហ៊ុន សែន ប្រចាំឆ្នាំ២០២០នេះ អមជាមួយប្រាក់រង្វាន់១៥លានរៀល។
បន្ថែមលើនេះ ក្រុមខេត្តព្រែវែង ក៏ក្រសោបបានពានចំនួន២ទៀតផងដែរ គឺពានរង្វាន់អ្នកចាំទីល្អ ដែលបានទៅលើអ្នកចាំទីពាក់លេខ២២ វីរៈ ដារ៉ា ព្រោះនៅក្នុងការប្រកួតនេះ ដារ៉ា បានជួយសង្រ្គោះបាល់បានជាច្រើនគ្រាប់ ពីការស៊ុតរបស់ក្រុមខេត្តត្បូងឃ្មុំ ចំណែកពាន១ទៀតគឺពានគ្រូបង្វឹកល្អ ដែលបានទៅគ្រូបង្វឹកក្រុមខេត្តព្រៃវែងលោក Matthew Sinclair ហើយអ្នកទាំង២នេះ ទទួលបានប្រាក់រង្វាន់ចំនួន១,៥លានរៀលដូចគ្នា។
ចំណែកក្រុមខេត្តត្បូងឃ្មុំ ដែលទទួលប្រាក់រង្វាន់ចំនួន៧,៥លានរៀល ចំពោះការទទួលបានលេខ២របស់ពួកគេ ប៉ុន្តែនីៅក្រោយការចាញ់ក្រុមខេត្តព្រៃវែង ១-០ នៅវគ្គផ្តាច់ព្រ័ត្រនេះ លោក ផន រស្មីពេជ្រ បានសម្រេចលាឈប់ពីគ្រូបង្វឹក ហើយការសម្រេចនេះ ត្រូវបានលោកប្រាប់ប្រព័ន្ធផ្សព្វផ្សាយក្នុងស្រុកថា ការលាឈប់នេះ ដើម្បីជាការទទួលខុសត្រូវ ចំពោះការមិនអាចជួយឲ្យក្រុមខេត្តត្បូងឃ្មុំ ទទួលបានជើងឯកថ្នាក់ខេត្ត ដូចកាលពីឆ្នាំ២០១៩។
ដោយឡែកក្រុមខេត្តកែប បានយកឈ្នះក្រុមខេត្តសៀមរាប ៣-០ ដើម្បីទទួលបានចំណាត់ថ្នាក់លេខ៣ ប្រចាំឆ្នាំ២០២០នេះ អមជាមួយប្រាក់រង្វាន់៥លានរៀល ហើយនេះជាលទ្ធផលដ៏ល្អចំពោះក្រុមខេត្តកែប ព្រោះការចូលរួមកន្លងមក ខេត្តកែប បានធ្លាក់តាំងពីវគ្គ៨បក្រុមចុងក្រោយ។ ជាមួយគ្នានេះខ្សែប្រយុទ្ធជាប្រធានក្រុម ទេព សើហ្វីអ៊ី របស់ខេត្តកែប បានឈ្នះពានជាកីឡាករស៊ុតបាល់បញ្ចូលទីបានច្រើនជាងគេ (១២គ្រាប់) នៅក្នុងការប្រកួតថ្នាក់ខេត្ត ប្រចាំឆ្នាំនេះ ហើយ សើហ្វីអ៊ី បានទទួលប្រាក់រង្វាន់ចំនួន១,៥លានរៀល៕