ក្លិបបាល់ទាត់ចំនួន២ ដែលកំពុងប្រកបអាជីពនៅលីកកំពូលកម្ពុជា ឆ្នាំ២០២០ គឺ ក្លិបកងយោធពលខេមរភូមិន្ទ និងអាស៊ីអឺរ៉ុបយូណាយធីត កំពុងតែប្រកាសស្វែងរកក្រុមយុវជន មានសមត្ថភាព និងទេពកោសល្យ ដែលមានអាយុចន្លោះពីក្រោម១៥ឆ្នាំ រហូតដល់ក្រោមអាយុ១៨ឆ្នាំ យកមកបណ្តុះបណ្តាល ដើម្បីឲ្យពួកគេ មានឱកាសក្លាយទៅជាកីឡាករអាជីព នាពេលអនាគត។
តាមសេចក្តីប្រកាស ដែលបានបង្ហោះនៅផេចហ្វេសប៊ុករបស់ក្លិបអាស៊ីអឺរ៉ុបយូណាយធីត បានឲ្យដឹងថា ក្លិប ដែលកំពុងឈរនៅចំណាត់ថ្នាក់លេខ៩ នៃលីកកំពូលកម្ពុជា ឆ្នាំ២០២០ មួយនេះ ត្រូវបានជ្រើសរើសយុវជនអាយុក្រោម១៨ឆ្នាំ និងអាយុក្រោម១៦ឆ្នាំ ដើម្បីចូលហ្វឹកហាត់ ដោយមានក្របខ័ណ្ឌ។
យ៉ាងណាក៏ដោយ នៅក្នុងសេចក្តីប្រកាសនៅ អាស៊ីអឺរ៉ុបយូណាយធីត បានផ្តោតខ្លាំងទៅលើយុវជន ដែលមានឧបនិស្ស័យលើវិស័យបាល់ទាត់ ហើយការជ្រើសរើសនេះ យកតែអ្នកមានទីលំនៅបច្ចុប្បន្ន នៅរាជធានីភ្នំពេញ និងស្រុកខ្សាចកណ្តាល ខេត្តកណ្តាល ដោយក្នុងជ្រើសរើសនេះ យកទាំងខ្សែការពារ ខ្សែបម្រើ និងខ្សែប្រយុទ្ធ។
ដោយឡែកក្លិបបាល់ទាត់កងយោធពលខេមរភូមិន្ទ ជ្រើសរើសយកតែយុវជន ដែលមានអាយុក្រោម១៥ឆ្នាំ ដែលកើតនៅក្នុងឆ្នាំ០០៥ និងឆ្នាំ២០០៧ទេ សម្រាប់ចូលហ្វឹកហាត់ជាក្រុមយុវជនថ្នាលរបស់ខ្លួន ហើយកំណត់យកតែប្អូនៗ ដែលរស់នៅក្នុងរាជធានីភ្នំពេញប៉ុណ្ណោះ។
តាមសេចក្តីប្រកាសរបស់ក្លិបកងយោធពលខេមរភូមិន្ទ ដែលកំពុងឈរនៅលេខ៦ នៃលីកកំពូលកម្ពុជា ឆ្នាំ២០២០ បានបញ្ជាក់ថា ការបើកវគ្គធ្វើតេស្តរកយុវជនមានអាយុក្រោម១៥ឆ្នាំនេះ នឹងចាប់ផ្តើមធ្វើនៅកីឡដ្ឋានស្តាតចាស់ នាថ្ងៃទី១ ខែសីហា ខាងមុខនេះ ចាប់ពីម៉ោង៧ ដល់ម៉ោង៩ព្រឹក ហើយប្អូនៗ ដែលមកធ្វើតេស្ត ត្រូវស្លៀកពាក់ជាឈុតកីឡា ខណៈការធ្វើតេស្តនេះ មិនមានការបង់ប្រាក់នោះទេ តែអ្នកជាប់ នឹងអាចក្លាយទៅជាកីឡាករអាជីព នាពេលអនាគត៕